Atyraý turǵyndary Naýryz merekesinde asyq atyp, qoı kóterdi
Búgin Atyraý qalasynyń shaǵyn aýdandarynda Naýryz merekesine arnalǵan birneshe is-shara ótti. Mahambet atyndaǵy akademııalyq qazaq drama teatry aldynda ótken is-sharaǵa oblys ákimi Mahambet Dosmuhambetov qatysyp, turǵyndardy merekemen quttyqtady.
«Naýryz merekesi adamdardy ult pen dinge, dil men tilge bólmeı, kerisinshe qaıyrymdylyq, izgilik jáne meıirim syndy izgi qasıetterge biriktiredi. Osydan bolar, atalǵan qundylyqtardy qanyna sińirgen qazaq ulty úshin bul kún erekshe áspetteledi. Babalarymyz Ulystyn uly kúninde bir-birine degen ókpe-renishti umytyp, bir-birine jaqsylyq tilegen. Qystan qymtyrylyp shyqqan álsizderdiń sharýasyna kómektesip, bulaq kózderin ashyp, tal egip ıgilikti ister istegen. Kún men tún teńesip, baıtaq dala kóktem shýaǵymen nurlanatyn Naýryz – jyl basy, jaqsylyqtyń bastaýy. Qut-berekeniń arqaýy – Naýryz ər shańyraqqa molshylyq syılasyn! Elimiz órkendeı bersin!», -dedi Mahambet Dosmuhambetov.
Al, «Retro park» saıabaǵynda ulttyq sport túrlerinen saıys ótti. Ony tamashalaýǵa jurtshylyq kóp jınaldy.
Munda kıiz úı tigilip, túrǵyndar arasynda túrli ulttyq sport túrlerinen saıysqa qatysty. Turǵyndar arqan tartysty. Balýandar ortaǵa qazaqsha kúresti kórsetti. Keıbiri asyq atyp, láńgi tepti. Qoı kóterip, bilek kúshin synap kórdi.
«Qazaqtyń ulttyq sport túrlerinen jeńiske jetkenderge dıplomdar men qoı tabys etildi. Boz kilem ústinde qazaqsha kúresten baq synaǵan palýandar jerebe sýyryp, qarsylastaryn anyqtady. Jınalǵan jurtshylyqtyń delebesin qozdyrǵan bul tartysqa toly beldesýlerde Dýlat Bágenovtiń juldyzy joǵary boldy. Qoı kóterý básekesinde Alpamys Aımuratov jeńimpaz atandy. Ol qoıdy 2 mınýtta 87 ret kóterdi», -dep habarlady oblystyq dene shynyqtyrý jáne sport basqarmasynyń baspasóz qyzmeti.
Eske sala ketelik, buǵan deıin búgin atyraýlyqtar qoǵamdyq kólikte tegin qatynap júrgenin habarlaǵan bolatynbyz.
