Atyraý turǵyndary qoǵamdyq kólikte tegin qatynap júr
«Smart Atyrau» kommýnaldyq memlekettik mekemesiniń dırektory Arslan Aronovtyń aıtýynsha, búgin, 25 qazanda qoǵamdyq kólikter jolaýshylardy tegin tasymaldap júr.
«Búgin elimizde 25 qazan – Respýblıka kúni qaıtadan atalyp ótip jatyr. Osyǵan oraı atyraýlyqtar men qonaqtar qala ishinde jáne oǵan taıaý ornalasqan eldi mekenderge qatynaıtyn barlyq qoǵamdyq kólikte tegin qatynap júr. Atyraý qalalyq ákimdigi men jolaýshy tasymaldaıtyn kásiporyndardyń ortaq sheshimimen qabyldanǵan bul múmkindikti jas aıyrmashylyǵyna qaramastan jolaýshylardyń bári paıdalana alady», - dep habarlady Arslan Aronov.
Al, Atyraý qalalyq ákimdigi baspasóz qyzmetiniń aqparatyna qaraǵanda, búgin qoǵamdyq kólikter 31 marshrýtpen jolaýshy tasymaldaýǵa shyqqan.
«Munaıly shahar men oǵan irgeles eldi mekenderge jolaýshylardy alty kásiporyn tasymaldaıdy. Bul kásiporyndardyń ıeliginde 240 avtobýs bar. Kásiporyndar kún saıyn kestege sáıkes 240 avtobýsty marshrýtqa shyǵarady. Búgin, 25 qazanda Atyraý qalasynyń aýmaǵy men oǵan irgeles qonystanǵan eldi mekenderge jolaýshylardy tasymaldaý úshin 240 avtobýs marshrýtqa shyqty. Avtobýstar kestege sáıkes shahar turǵyndary men qonaqtardy tegin tasymaldaýdy jalǵastyrady», -dep habarlady ákimdiktiń baspasóz qyzmetinen.
Eske sala ketelik, budan buryn Atyraý turǵyndary 25 qazanda qoǵamdyq kólikte tegin júretinin habarlaǵan bolatynbyz.
