Atyraý turǵyndary 261 saılaý ýchaskesinde tańdaýyn jasap jatyr
Atyraý oblystyq aýmaqtyq saılaý komıssııasynyń tóraǵasy Azamat Aımanakýmovtyń málimetinshe, búgin jergilikti ýaqytpen tańǵy saǵat 07:00-de 261 saılaý ýchaskesi ashyldy.
Densaýlyq saqtaý, áskerı bólimshe men tergeý ızolıatorynda 11 jabyq ýchaske jumys isteıdi.
«Ýchaskelik saılaý komıssııalary músheleriniń quramyna saıası partııalardan 1306 (66,43%), qoǵamdyq birlestikterden 660 (33,57%) adam engizildi. Atyraý oblysynda daýys berý quqyǵyna ıe saılaýshylardyń sany 409 949 adamdy qurady. Onyń ishinde ózge oblystardan óz ótinishine sáıkes tizimge engizilgen 12 956 saılaýshy bar», -deıdi Azamat Aımanakýmov.
Onyń deregine súıensek, saılaý ýchaskeleriniń 165-de saılaýshylardyń turǵylyqty mekenjaıy boıynsha izdeýi, Atyraý qalasyndaǵy 5 saılaý ýchaskesinde turǵylyqty tirkeýi joq saılaýshylar úshin servıstik qyzmet kórsetiledi. Azamattarǵa tıisti saılaý komıssııalarynyń úı-jaılarynda elektorat tizimimen tanysý, sondaı-aq olarǵa engizilgen saılaýshylar jónindegi derekterdiń durystyǵyn tekserý múmkindigi berilgen.
Kandıdattardyń senim bildirgen 784 ókili tirkelgen. Sondaı-aq EQYU-nyń 2 halyqaralyq baıqaýshysy kelgen.
Aıta keteıik, H.Dosmuhamedov atyndaǵy Atyraý ýnıversıtetiniń bazasynda halyqaralyq baıqaýshylarǵa járdemdesý ortalyǵy ashylǵan.
Buǵan deıin Atyraý oblysynda 409 949 saılaýshy 261 saılaý ýchaskesinde daýys beretinin jazǵan edik.
Saǵat 12.00-degi jaǵdaı boıynsha óńirdiń 40,42 paıyzy daýys berip úlgerdi.
