Atyraý turǵyndary 25 qazanda qoǵamdyq kólikte tegin júredi
Smart Atyrau kommýnaldyq memlekettik mekemesiniń dırektory Arslan Aronovtyń aıtýynsha, 25 qazan kúni qoǵamdyq kólikter munaıly shahar turǵyndary men qonaqtaryn tegin tasymaldaıdy.
«Bıyl elimizde 25 qazan – Respýblıka kúni qaıtadan atyp ótiledi. Osyǵan oraı atyraýlyqtar men qonaqtar qala ishinde jáne oǵan taıaý ornalasqan eldi mekenderge qatynaıtyn barlyq qoǵamdyq kólikte tegin júredi. Ákimdik pen jolaýshy tasymaldaıtyn kásiporyndardyń ortaq sheshimimen qabyldanǵan bul múmkindikti jas aıyrmashylyǵyna qaramastan jolaýshylardyń bári paıdalana alady», -dep málim etti Arslan Aronov.
Atyraý qalalyq ákimdigi baspasóz qyzmetiniń málimetine súıensek, qazir qoǵamdyq kólikter 31 marshrýtpen jolaýshy tasymaldaıdy.
«Munaıly shahar men irgeles eldi mekenderge jolaýshy tasymaldaıtyn 6 kásiporyn bar. Bul kásiporyndardyń balansynda 240 avtobýs tirkelgen. Kún saıyn kestege sáıkes 240 avtobýs qala aýmaǵynda jáne oǵan irgeles qonystanǵan eldi mekenderge jolaýshy tasymaldaýǵa shyǵady», -dep habarlady ákimdiktiń baspasóz qyzmetinen.
Eske sala ketelik, Atyraýda jolaýshy tasymaldaý shyǵynyn sýbsıdııalaý usynylǵanyn habarlaǵan bolatynbyz.
