Atyraý teatry Mysyrda «Sultan Beıbarys» spektaklin sahnaǵa shyǵarady
Atyraý oblystyq Mádenıet, tilderdi damytý jáne arhıv isi basqarmasynyń basshysy Ábil Jolamanovtyń aıtýyna qaraǵanda, qazan aıynda Beıbarys Sultannyń 800 jyldyǵyna oraı aptalyq ótkizý josparlanyp otyr.
«Bıyl Mysyrda Mámlúk memleketiniń negizin qalaǵan Deshti Qypshaq dalasynyń ataqty perzenti Sultan Beıbarystyń 800 jyldyq mereıtoıy atalyp ótiledi. Osyǵan oraı birneshe is-sharany ótkizý kózdelip otyr. Onyń ishinde oblystyq tarıhı-ólketaný mýzeıinde túrki jurtynyń maqtanyshy Beıbarys Sultannyń mereıtoıyna arnalǵan halyqaralyq ǵylymı-zertteý konferentsııasy, «Erligi eren er babam!» respýblıkalyq aqyndar aıtysy, «Dala barysy – Mysyrdyń Beıbarysy» taqyrybynda sýretshilerdiń respýblıkalyq sımpozıýmy bar», - dep habarlady Ábil Jolamanov.
Onyń aıtýynsha, qazan aıynyń ekinshi onkúndiginde Mahambet Ótemisuly atyndaǵy Atyraý oblystyq akademııalyq qazaq drama teatrynyń ujymy Mysyr eliniń astanasy Kaır qalasyna barady.
«Munda atyraýlyq ártister belgili dramatýrg Raqymjan Otarbaevtyń «Sultan Beıbarys» spektaklin sahnalaıdy. Qazir Qazaqstannyń Mysyrdaǵy elshiligi arqyly kelissóz júrip jatyr», - dedi Ábil Jolamanov.
Buǵan qosa, daýylpaz aqyn Mahambet Ótemisulynyń 220 jyldyǵyna qazaq kúı óneriniń negizin qalaǵan kompozıtor Qurmanǵazy Saǵyrbaıulynyń týǵanyna 200 jyl tolýyna oraı birqatar respýblıkalyq is-shara ótkizý josparlanǵan.
Eske sala ketelik, budan buryn Atyraýdaǵy Dına orkestriniń ujymy astrahandyqtar chellendjin BQO-daǵy áriptesterine joldaǵanyn habarlaǵan bolatynbyz.
