Atyraý sý aıdyndarynda balyq qyrylyp jatqan joq - Sáken Dildahmet
ASTANA. QazAqparat - Atyraý oblysynyń aýmaǵynyń sý aıdyndarynda balyq qyrylyp jatqan joq. Bul jaıynda QazAqparat tilshisine QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmet aıtty.
Aıta keterligi, Feısbýkte Arman Haırýllın esimdi jeli qoldanýshysy Atyraýdyń «Býgorkı» saıajaı alaby tusynda ózen muzynyń astynan óli balyqtar shyǵyp jatqanyn túsirip, vıdeo jarııalaǵan bolatyn.
«Búgin 3 naýryz. Býgorkı. Muz astyndaǵy barlyq balyq óli. Jeltoqsan aıynda balyq satýǵa tyıym salý kerektigin aıtyp edim. Meni taǵy da ápendi dep qabyldap otyr. Muny qalaı baqylaýǵa bolady? Myń tonnaǵa jetti», - dep jazdy ol.
Osyǵan oraı QR AShM Orman sharýashylyǵy jáne janýarlar álemi komıtetiniń baspasóz hatshysy Sáken Dildahmetten pikir bilgen edi.
«Eger bul Atyraýda túsirilgen vıdeo bolsa, onda byltyr jeltoqsanda qyrylǵan balyqtardyń ólekseleri nemese balyqtardyń tabıǵı ólýi. Muz erigende ár sý aıdynynan qysta ólgen balyqtardyń ólekseleri shyǵyp jatady. Ol ýaqytynda aýa jibermegennen bolady. Qazirgi tańda Atyraýda balyq qyrylyp jatqan joq. Mamandar barlyq sý aıdyndardy baqylaýda ustaýda», - dep jaýap berdi ol.
