Atyraý stadıonynda tóbeleske qatysqan 28 adamǵa aıyppul salyndy
Ákimshilik quqyq buzýshylyqtar jónindegi mamandandyrylǵan sotynyń baspasóz qyzmetinen málim etkendeı, 28 adamnyń isi QR Ákimshilik quqyq buzýshylyq týraly kodeksiniń 434-babynyń 1-bóligimen qaralǵan.
Quqyq buzýshylar qoǵamdyq orynda, atap aıtqanda, «Atyraý» men «Aqtóbe» fýtbol komandalary arasyndaǵy kezekti match ótetin stadıon aldynda tóbelesken. Olardyń bul áreketeti aınalasyndaǵylardy syılamaý, qoǵamdyq tártipti jáne jeke tulǵalardyń tynyshtyǵyn buzý retinde saralanǵan.
Sot ákimshilik jaza qoldaný barysynda quqyq buzýshylardyń jaýaptylyǵyn aýyrlatatyn mán-jaılardyń joqtyǵyn eskerdi. Sondaı-aq, sottalýshylardyń kinásin moıyndaǵanyn, otbasylyq jaǵdaıyn, ákimshilik quqyq buzýshylyqty birinshi ret jasaǵanyn jaýaptylyǵyn jeńildetetin mán-jaılar retinde tanydy.
Sot qaýlysymen 2 adamnyń árqaısysyna 15 315 teńge, al, 26 tulǵanyń árqaısysyna 10 721 teńge kóleminde ákimshilik aıyppul salyndy.
Sot qaýlylary zańdy kúshine engen joq.
Eske sala ketelik, buǵan deıin Atyraý stadıonynda fýtbol jankúıerleri tóbelesip qalǵanyn jazǵan bolatynbyz.
Fýtbol jankúıerleri arasyndaǵy tóbeles 19 maýsymda saǵat 17:55 shamasynda Atyraý qalasyndaǵy «Munaıshy» stadıonynyń aldynda bolǵan.
«Polıtsııa qyzmetkerleri qoǵamdyq orynda quqyq buzýshylyqqa jol bergen 30 adamdy ustady. Olar Atyraý qalalyq polıtsııa basqarmasyna jetkizildi. Tóbeleske kezinde jankúıerlerdiń qolynda túrli-tústi tútin shyǵaratyn dybysy bar zat bolǵan», -dep málim etti baspasóz qyzmetinen.