Atyraý stadıony fýtbol ótkizýge daıyn
NUR-SULTAN. QazAqparat - Atyraý qalasyndaǵy «Munaıshy» stadıony fýtboldan Qazaqstan birinshiligi oıyndaryn ótkizýge daıyn. Qazaqstan fýtbol federatsııasy men Qazaqstan kásipqoı fýtbol lıgasynyń stadıondardy tekserý baǵytynda qurylǵan komıssııasy osyndaı sheshim qabyldady, dep habarlaıdy QazAqparat tilshisi.
Esterińizge sala ketelik, bıylǵy dop dodasy bastalardan buryn Atyraý qalasyndaǵy «Munaıshy» stadıony fýtboldan Qazaqstan birinshiligi oıyndaryn ótkizýge daıyn emestigi atap kórsetildi. Onda oıyn ótkizýge tıym salyndy. Nátıjesinde jergilikti «Atyraý» komandasy óz alańyndaǵy oıynyn Nur-Sultan qalasyndaǵy «Astana-arena» stadıonynda ótkizýge májbúr boldy.
Qazaqstan kásipqoı fýtbol lıgasynyń habarlaýynsha https://pflk.kz/rus/news/5303#league=12, jergilikti basshylyq tarapynan júrgizgen tıisti jumystar nátıjesinde stadıon alańyn aýystyrýǵa jeke ınvestor tartylǵan. Alań jasandy tósenishpen jabdyqtaldy.
«Munaıshy» stadıony 1950 jyly paıdalanýǵa berilgen. Stadıon 8690 jankúıerdi qabyldaı alady.
Jańartylǵan jasandy alańmen jabdyqtalǵan stadıon 19 maýsymda alǵashqy oıyndy qabyldaıdy. Bul kúni fýtboldan Qazaqstan kýbogynyń jartylaı fınalynda jergilikti «Atyraý» Shymkenttiń «Ordabasy» komandasymen qarymta kezdesý ótkizedi. Alǵashqy kezdesýde eki komanda 1:1 esebine qanaǵat bildirdi.
Budan buryn fýtboldan 2019 jylǵy Qazaqstan kýbogynyń fınaly Taraz qalasynda ótýi múmkin ekenin habarlaǵan edik.
