Atyraý sotynyń uıǵarymymen kámeletke tolmaǵan 4 bala ákesimen birge turatyn boldy
Atyraý oblysynyń kámeletke tolmaǵandar isteri jónindegi mamandandyrylǵan aýdanaralyq sotynda kámeletke tolmaǵan balalardyń turǵylyqty jerin ózgertý týraly azamattyq is qaraldy.
Talap aryz berýshi S.-nyń aıtýynsha, áıeli J.-men aradaǵy zańdy nekesi buzylǵan. Al, kámeletke tolmaǵan tórt balanyń turǵylyqty jeri anasymen dep aıqyndalǵan. Alaıda, osy kezge deıin balalar ákesiniń tárbıesinde bolǵan. Balalar ákesimen birge turýdy qolaıly kórgen.
«Sot isin júrgizý barysynda ata-anasy men balalarynyń múddelerine sáıkes keletin sheshim qabyldaý maqsatynda daýlasqan taraptardy tatýlastyrý jumysy atqaryldy. Sýdıanyń tatýlastyrý rásimin júıeli júrgizýiniń nátıjesinde azamattyq isti medıatsııa tártibimen retteý týraly taraptardyń kelisimi bekitildi. Kelisimniń sharttary boıynsha kámeletke tolmaǵan tórt balanyń turǵylyqty jeri ákesimen birge bolatyny bekitildi. Óz kezeginde talap qoıýshy kelisimde aıqyndalǵan ýaqytta anasynyń balalarymen kezdesýine kedergi keltirmeýge mindettendi», -dep habarlady sottyń baspasóz qyzmeti.
Sot taraptarǵa daýdy medıatsııa tártibinde retteýdiń zańdy saldarlaryn túsindirdi. Sot uıǵarymymen medıatsııalyq kelisim bekitilip, azamattyq isti júrgizý toqtatyldy.
Sot uıǵarymy zańdy kúshine engen joq.
Eske sala ketelik, buǵan deıin Atyraýda kishkentaı balaqaıdyń denesi balabaqshadan kógerip kelgenin habarlaǵan edik.
Oblys ákiminiń orynbasary Jasulan Bısembıev atalǵan jaıttyń baqylaýǵa alynǵan.
«Atyraýdaǵy «Zeınep Ámına» balabaqshasyndaǵy jaǵdaıǵa baılanysty máseleniń tıisti oryndar baqylaýynda ekendigin aıtqym keledi. Qazirgi ýaqytta jaǵdaıdy jan-jaqty zerdeleý boıynsha Atyraý oblystyq bilim berý basqarmasy, Atyraý qalalyq bilim bólimine tapsyrmalar berdim», -dep habarlady Jasulan Bısembıev.
