Atyraý soty balanyń ornyna ákesin jazalady
ATYRAÝ. QazAqparat - Atyraý soty balasy jasaǵan jol-kólik oqıǵasy úshin onyń ákesin jazalady, dep habarlaıdy QazAqparat tilshisi.
«Atyraý qalasynyń mamandandyrylǵan ákimshilik sotynda kámelettik jasqa tolmaǵan azamatqa qatysty ákimshilik is qaraldy. Jas jigit kólik quralyn júrgizýge quqyǵy joq bola tura, óziniń avtokóligin Atyraý qalasynyń Gagarın kóshesinde minip júrgen. Ol jol júrý erejesin buzyp, tıisti ara qashyqtyqty saqtamaı, aldynda kele jatqan avtokólikterge soqtyǵysqan. Solaısha, kólikterge materıaldyq zalal keltirgen.
Quqyq buzýshynyń kinási iske tirkelgen óziniń túsiniktemesimen, ákimshilik quqyqbuzýshylyq týraly hattamasymen jáne basqa da is boıynsha jınaqtalǵan qujattarmen dáleldendi.
Sot kámeletke tolmaǵan jas jigitti kináli dep tanyp, onyń tabysy bolmaýyna baılanysty zańdy ókili - ákesine aıyppul salyndy», dep habarlady Atyraý qalasynyń mamandandyrylǵan ákimshilik sotynyń baspasóz qyzmeti.
