Atyraý saıabaǵynda modýldik úlgidegi statsıonarlyq beket ashyldy
Atyraý oblysy Polıtsııa departamentiniń bastyǵy Qamza Úmbetqalıevtiń aıtýynsha, modýldik tıptegi statsıonarlyq beketter qalanyń adamdar kóp shoǵyrlanatyn jerlerinde ornalasqan. Qazir bes beket táýlik boıy jumys istep tur. Jyl basynan beri modýldi statsıonarlyq beketterdiń kezekshi qyzmetkerlerine túrli máseleler boıynsha 500-ge jýyq azamat júgingen.
Polıtsııa departamentiniń basshysy atap ótkendeı, óńir boıynsha modýldik úlgidegi taǵy 19 beket ornatý josparlanyp otyr. Onyń 10-y Atyraý qalasynda, qalǵandary jeti aýdan ortalyqtarynda ashylady.
«Jalpy, qabyldanǵan sharalar nátıjesinde, oblys kóleminde barlyq baǵyttardaǵy, sonyń ishinde qoǵamdyq oryndarda quqyqbuzýshylyqtar sany eki esege tómendep, jalpy qylmystyq quqyqbuzýshylyqtardyń ashylý kórsetkishi jaqsardy», - dedi Qamza Úmbetqalıev.
Onyń sózinshe, oblys ákimdiginiń qoldaýymen 2020 jylǵa josparlanǵan 34 ýchaskelik polıtsııa pýnkteriniń búgingi kúni 28-i ashyldy. Quqyq buzýshylyqqa jedel den qoıý, aýmaqtyń turǵyndary úshin ýchaskelik ınspektory únemi qoljetimdi bolý maqsatynda, salynǵan ýchaskelik polıtsııa beketteriniń 22-si turǵyn úımen biriktirilgen.
Búginde oblys aýmaǵynda 92 ýchaskelik polıtsııa pýnkteri qyzmet atqarady. Olardyń 27-si oblys ortalyǵynda ornalasqan. Qosymsha alty ýchaskelik polıtsııa pýnktin ashý qarastyrylýda.
Oblys boıynsha ýchaskelik polıtsııa ınspektorlarynyń shtat sany 232 birlikti, oǵan qosa kómekshileri 71 birlikti qurap otyr. Olardyń barlyǵy 100% zamanaýı tehnıkamen: portatıvti beınetirkeýishtermen, radıostantsııalarmen jáne planshettermen qamtamasyz etilgen.
Atyraýda Jastar saıabaǵy ashylǵanyn buǵan deıin habarlaǵan bolatynbyz.