Atyraý prokýrorlary 365 kásipkerdiń quqyǵyn qorǵap, 11 mln teńgesin qaıtardy
Atyraý oblystyq prokýratýrasynyń baspasóz qyzmetinen málim etkendeı, prokýrorlyq qadaǵalaýdyń baǵyty – kásipkerlerdiń quqyqtaryn qorǵaý.
«Bıylǵy jyl basynan Atyraý qalasynyń prokýratýrasy 365 kásipkerdiń quqyǵyn qorǵap, jergilikti atqarýshy organnan 11 mln teńgesin keri qaıtardy. Máselen, prokýrorlyq qadaǵalaý aktisi negizinde memlekettik kiris organy 269 kásipkerge qatysty shyǵarylǵan banktik shottardy toqtatý týraly zańsyz buıryqtardyń kúshin joıdy», - dep habarlady prokýratýranyń baspasóz qyzmeti.
Sondaı-aq, kásipkerlerdiń banktik shottarynan shyǵys operatsııalaryn negizsiz toqtatý deregi anyqtalǵan. Sonyń nátıjesinde taǵy 4 kásipkerdiń quqyǵy qalpyna keltirilgen.
«Salyq organdarymen «Wipon» qosymshasy arqyly alynǵan habarlamalar negizinde taǵaıyndalǵan 51 zańsyz tekseristiń kúshi joıyldy. Jalpy tekserýler tek jeke jáne zańdy tulǵalardyń aryzy negizinde júzege asyrylatyny nazardan tys qalǵan. Kináli tulǵalar tártiktik jaýapqa tartyldy», -dep málim etti baspasóz qyzmetinen.
Eske sala ketelik, budan buryn Atyraý oblysynda 180 jumysshyǵa 32 mln teńgeniń jalaqy bereshegi ótelgenin habarlaǵan bolatynbyz.
Atyraý oblysynyń prokýrory Baýyrjan Jumaqanovtyń málimetinshe, bıylǵy 6 aıda 58 myńnan astam azamattyń, onyń ishinde 18 myń balanyń, 4,2 myń kásipkerdiń quqyǵy qorǵalǵan.
Prokýrorlyq den qoıý sharalary arqyly memleketke 489 mln teńge zalal ótelip, 6,1 mlrd teńgeniń múlki qaıtaryldy. Prokýroratýra organdarynyń úılestirýimen 180 jumysshyǵa 32 mln teńgeniń jalaqy bereshegi ótelgen.
