Atyraý prokýratýrasy jóndeý júrgizilip jatqan mektepterdi baqylaýǵa aldy
Atyraý qalasy prokýrorynyń orynbasary Mıras Jalmýrzınniń aıtýynsha, qalalyq bilim bólimine qarasty №13 D.Baıbosynov, №19 Q.Sátpaev, №22 Á.Moldaǵulova, №27 I.Taımanov atyndaǵy jáne 31-mektep-gımnazııasynda, №1 «Sábı álemi» bóbekjaı-balabaqshasynda kúrdeli jóndeý jumystary júrgizilip jatyr.
«Alaıda, №19 Q.Sátpaev atyndaǵy orta mektep pen №1 «Sábı álemi» balabaqshasyndaǵy jóndeý baıaý júrgizilýde. Kelisimshartqa sáıkes jóndeýdiń aıaqtalýyna 2 aıǵa jýyq ýaqyt qaldy. Áli de atqarylatyn jumys kóleminiń aýqymdylyǵyna baılanysty jumysshylar sanyn kóbeıtý qajet bolady. Qalalyq bilim bólimi eki merdiger kompanııanyń basshylyǵymen birlesken jıyn ótkizýi qajet. Óıtkeni, qazir kúrdeli jóndeý jumystary tek oryndaýshylar deńgeıinde ǵana júrip otyr. Merdiger kompanııalardyń basshylary jóndeý júrip jatqan bilim nysandaryna kelip, baqylaý júrgizýge tıis. Mektepterdegi kúrdeli jóndeý jumystary prokýratýranyń qatań baqylaýyda bolady», - dep habarlady Mıras Jalmýrzın.
Onyń pikirinshe, jumystyń sapaly ári merziminen keshiktirilmeı júrgizilýi kerek. Saraptamadan ótken jobalyq smetalyq qujatta kórsetilgen jumystardyń múltiksiz oryndalǵany jón. Al, qandaı da bir ózgeristerdi engizý úshin zańdy negizdemesi bolýy qajet.
Eske sala ketelik, budan buryn Atyraýda birneshe mekteptiń oqýshylary jóndeý jumysyna baılanysty ózge bilim ordasynda oqıtynyn habarlaǵan bolatynbyz.
Keıin Atyraýda 11 mektep úsh aýysymda oqytýdy jalǵastyratynyn jazǵan edik.
