Atyraý polıtsııasy Qulsary qalasynyń eks-ákimine qatysty is qozǵady

ATYRAÝ. QazAqparat – Atyraý polıtsııasy Qulsary qalasynyń burynǵy ákimine qatysty tergeýdi bastady. Qazir Qarjaý Sharǵabaevtyń júrgen jerin anyqtaý is-sharasy atqarylyp jatyr. Bul týraly oblystyq polıtsııa departamentiniń baspasóz qyzmetinen málim etti, dep habarlaıdy QazAqparat tilshisi.

«Búgin, 20 mamyrda Atyraý qalasyndaǵy «Kóktem» shaǵyn aýdanynda belgisiz adamdar ózin Qulsary qalasynyń burynǵy ákimi Qarjaý Sharǵabaev dep tanystyrǵan azamatty polıetılen oramadaǵy aq tústi untaqpen ustap alǵany týraly vıdeo taratty. Vıdeo avtory aq untaqtyń esirtki zaty ekenin aıtady. Atalǵan derekke qatysty Atyraý qalalyq polıtsııa basqarmasynyń №2 bólimi QR Qylmystyq kodekstiń 296-babynyń 2-bóligimen tergeý amaldaryn bastady. Qazir Jylyoı aýdanynyń 41 jastaǵy turǵyny Qarjaý Sharǵabaevtyń júrgen jerin anyqtaý úshin arnaıy is-shara júrgizilip jatyr», - dep habarlady departamenttiń baspasóz qyzmeti.

Keıin Facebook jelisinde Qarjaý Sharǵabevtyń 19 mamyr kúni Tomarly aýylynda belgisiz 7-8 adamnyń ózin uryp-soǵyp, telefonyn tartyp alyp, qorqytyp vıdeoǵa túsirgeni týraly beıneúndeýi jarııalandy.

«Bul derekke baılanysty QR Qylmystyq kodeksi 293-baby 2-bóliginiń 1-tarmaǵymen tergeý bastaldy», - dep málim etti departamenttiń baspasóz qyzmetinen.