Atyraý polıtsııasy kólik júrgizýshileriniń usynysymen Telegram-da arnaıy chat ashty

ATYRAÝ. QazAqparat – Atyraý polıtsııasy kólik júrgizýshileriniń usynysymen Telegram-da arnaıy chat ashty, dep habarlaıdy QazAqparat tilshisi.
None

Jergilikti polıtsııa qyzmeti basqarmasynyń bastyǵy, polıtsııa polkovnıgi Erlan Bıǵambaevtyń aıtýynsha, arnaıy chatta jol qozǵalysy qaýipsizdigin qamtamasyz etýdegi azamattyq bastamalarǵa qoldaý kórsetiledi.

«Negizgi maqsat – jol qozǵalysyndaǵy qaýipsizdik saqtaý úshin tártipti kúsheıtý. Telegram jelisi únemi polıtseılerdiń baqylaýynda bolady. Munda jol qozǵalysyna qatysty kez elgen zań buzýshylyq nazardan tys qalmaıdy. Quqyq buzǵandarǵa zań aıasynda shara qoldanylady. Tirkelýshilerden jol erejesin buzǵan derektiń foto-beıne jazbasy men aqparatty jiberý suralady», - dep habarlady Erlan Bıǵambaev.

Onyń aıtýynsha, jolaýshylar tasymalymen aınalysatyn avtopark basshylary men taksı qyzmetimen aınalysatyn, sondaı-aq iri kásiporyndardaǵy kólik júrgizýshilerimen kezdesýi ótken.

«Júk kólikteriniń júrgizýshileri tas joldarda basyp ozý qaǵıdasyn buzatyn, avarııalyq jaǵdaı týǵyzatyn derekterdiń kezdesetinin aıtyp otyr. Mine, sondaı derekterdiń foto-beıne jazbasyn Telegram jelisindegi chatqa joldansa, zańǵa sáıkes dereý shara qoldanamyz. Arnaıy chatta aqparatty, foto-vıdeony anonımdi túrde taratýǵa qatysty usynysty qaperge alyp otyrmyz», - dep málim etti Erlan Bıǵambaev.

Eske sala ketelik, buǵan deıin Atyraý oblysyndaǵy respýblıkalyq joldarda kólik apatynan 33 adam kóz jumǵanyn jazǵan edik.

Patrýldik polıtsııa rotasynyń komandıri, polıtsııa kapıtany Ádilbek Shahmetovtiń málimetinshe, jyl basynan beri jyldamdyqty asyrǵan 12 myńnan astam júrgizýshi anyqtalǵan.

«Atyraý oblysyndaǵy respýblıkalyq mańyzy bar joldarda jyl basynan beri 38 jol-kólik oqıǵasy tirkeldi. Kólik apatynyń saldarynan 33 adam mert boldy. Al 57 adam ártúrli dene jaraqatyn aldy», - dedi Ádilbek Shahmetov.


Сейчас читают