Atyraý polıtseıleri júrgizýshilerge alys jolǵa shyqpaýdy eskertti
Atyraýda 6 qańtardan beri aýa raıy kúrt qubylyp tur. Sol kúni jańbyr jaýdy. Al, 7 qańtarda jaıaý burqasyn borady.
«Qazgıdromet» RMK Atyraý oblystyq fılıalynyń dırektory Salaýat Tólenovtiń deregine súıensek, erteń, 8 qańtarda aýa temperatýrasy -23 gradýsqa deıin tómendeıdi.
«Atyraý oblysynyń soltústigi men ońtústiginde, shyǵysynda kóktaıǵaq, jaıaý burqasyn kútiledi. Ońtústik-batystan soqqan jel soltústikke aýysyp soǵady. Túnde oblystyń soltsútiginde jel ekpini sekýndyna 15-20 metr, kúndiz 17-22 metrge jetedi», -dep habarlady oblystyq tótenshe jaǵdaılar departamentiniń qoǵammen baılanys toby.
Aýa raıynyń osylaı kúrt qubylýyna oblystyq polıtsııa departamentiniń jergilik polıtsııa qyzmeti basqarmasy júrgizýshilerge eskertý jasady.
«Oblys aýmaǵynda 7 qańtardan bastap aýa temperatýrasynyń -20 gradýsqa deıin tómendeıtini kútilip otyr. Sol sebepten, júrgizýshilerden qozǵalys kezinde qaýipsizdik talabyn saqtaýdy suraımyz. Aýa raıynyń qolaısyzdyǵyna baılanysty tejeý jolynyń uzaratyndyǵyn qaperde ustaý kerek. Múmkindiginshe alys saparǵa shyǵýdan bas tartqan jón. Eldimekender arasynda jaıaý júrmeý qajet. Tasjoldarda qozǵalys shektelýi múmkin. Tótenshe jaǵdaılar departamentinen sms-habarlama arqyly joldanatyn aqparatqa nazar aýdaryńyz», -dep aqparat taratty polıtsııa departamentiniń baspasóz qyzmeti.
Eske sala ketelik, buǵan deıin Atyraýda muz oıylyp, Jaıyqqa túsip ketken eki adamnyń bireýi qutqarylǵanyn jazǵan bolatynbyz.
Keıin Jaıyq ózenine batyp ketken er adam áli tabylmaǵanyn habarlaǵan edik.