Atyraý polıtseıleri kópirden sekirmek bolǵan 38 jastaǵy er adamdy qutqardy
Oblystyq polıtsııa departamenti baspasóz qyzmetiniń aqparatyna qaraǵanda, oqys oqıǵa 1 jeltoqsanda bolǵan.
«Sol kúni saǵat 1:50 shamasynda 38 jastaǵy turǵyn Atyraý qalasynyń «Balyqshy-Jumysker» baǵytyndaǵy kópirden sekirýge oqtalǵan. Ony ýchaskelik polıtsııa ınspektorlary baıqap qalǵan. Olar sýıtsıd týraly jaqyn mańdaǵy ýchaskelik polıtsııa ınspektorlaryna radıoqabyldaǵysh arqyly habarlap, kómekke shaqyrǵan. Tártip saqshylary, polıtsııa kapıtandary Nurbaba Kalıdýllın, Bekejan Sabırov, Ǵalym Kabdelov, Meırambek Qangereıuly jáne polıtsııa aǵa leıtenanty Oraz Tajikenovtiń qyraǵylyǵynyń arqasynda er adam sanaýly mınýtta qutqaryldy», -deıdi oblystyq polıtsııa departamentiniń bastyǵy, polıtsııa polkovnıgi Qamza Úmbetqalıev.
Ózine qol salmaq bolǵan er adamdy qutqarǵan polıtseıdiń biri Meırambek Qangereıulynyń aıtýynsha, kez kelgen tártip saqshysy mundaı jaǵdaıǵa tap bolǵanda tez arada kómek berýdi ǵana oılaıdy.
«Kópirdiń jaqtaýyndaǵy temirden ustap turǵan er adamdy baıqadym. Túngi mezgil edi. Qystyń birinshi kúni, temirdiń sýyqtyǵyna shydaı almaı, kópirge sekirip ketse, jaǵdaı ýshyǵatynyn túsindim. «Temirden jiberme, usta, qolyńnan ustaıyn ba? Qolyńdy maǵan soz» deı berdim. Ekinshi áriptesim «Bulaı jasama, baýyrlaryńdy oıla, ata-anań bar, seni úıde kútip otyr» dep jatty. Osyndaı sátte polıtseılerdiń moraldyq-psıhologııalyq daıyndyǵy ańǵarylady. Sebebi, qyzmet babynda men jáne meniń áriptesterim túrli qaýip-qaterge tap bolamyz. Sondaı qıyn sátti uzaq ýaqyt oıtalqysyna salatyn kezder de bolady», - deıdi polıtsııa kapıtany Meırambek Qangereıuly.
Eske sala ketelik, budan buryn 700-den astam atyraýlyq júrgizýshi kólikterine ksenon taqqanyn jazǵan edik.
