Atyraý polıtseıleri balaly áıelge qamqorlyq kórsetti
ATYRAÝ. QazAqparat - Atyraýlyq turǵyn 20 jyl otasqan áıelin úıinen qýyp shyqqan, dep habarlaıdy QazAqparat.
Almagúl 20 jylǵa jýyq bir shańyraq astynda ómir súrgen jubaıynyń kishkentaı balasymen birge bir kúnde úıden qýyp shyqqanyn túsine alar emes.
«Enem qaıtys bolǵansha tynysh ómir súrdik. Odan keıin jalǵyz ulymyzdan aıyrylyp qaldyq. Joldasym araqqa salyna bastady. Men besinshi sábıdi dúnıege ákeldim. Dúnıege kelgen sábıdiń qyz ekenin bilgen joldasym meni úıge kirgizbedi. Úlken qyzdarymdy kórýge múmkindik bolmady, sebebi olardy ózimmen birge alyp ketýge baspanam joq. Ózimniń anam kórshi oblysta turady, jaǵdaıymdy aıtyp, kóńil-kúıin túsirgim kelmeıdi. Atyraýdan turaqty jumys tapqym kelgenmen, balamdy qaraıtyn adam joq, onyń ústine páter jaldaýǵa da qarajatym jetpeıdi», - dep muńyn aıtty Atyraý turǵyny.
Atyraý oblysy polıtsııa departamenti Jergilikti polıtsııa qyzmeti áıelderdi zorlyq-zombylyqtan qorǵaý tobynyń erekshe tapsyrmalar jónindegi aǵa ınspektory Bıbigúl Tólegenova túrli taǵdyrdyń kýási bolǵan. Polıtsııa podpolkovnıgi B.Tólegenova quqyqtyq túsindirý jumystaryn júrgizse, ınspektor Samal Sýpalıeva balaly anany Almagúl yqshamaýdanyndaǵy daǵdarys ortalyǵyna ornalastyrý úshin qujattardy toltyrdy.
Daǵdarys ortalyǵynyń mamandary polıtseılermen birge neke kýáligin qaıta jasap, sodan keıin balanyń týý týraly kýáligin rásimdeýge kirisedi.
Daǵdarys ortalyǵynda áıelder balasymen birge 6 aı tegin tura alady, osy ýaqyt ishinde aıaqqa turyp, turaqty jumys tabýyna mol múmkindik bar.
«Balamda «rahıt» aýrýynyń alǵashqy belgileri bar, ony emdep, aldaǵy ýaqytta qalǵan qyzdarymmen de qaýyshatyn bolamyn», - deıdi daǵdarys ortalyǵyna ornalasqan Almagúl.
Polıtsııa departamentimen memorandýmǵa kelisken azamattyq birlestikter qazirgi ýaqytta Almagúlge qamqorlyq tanytýdy josparlap otyr, kıim-keshek jáne turmysqa qajetti zattarmen qamtamasyz etýde.
Aıta ketelik, Atyraýda jarty jyldyń ishinde polıtsııadan 400-den astam áıel kómek suraǵan. Onyń ishinde 16 áıel men kámelet jasyna tolmaǵan 31 bala jan-jaqty qamqorlyq kórsetetin memlekettik mekemege ornalastyryldy.
