Atyraý polıtseıleri áleýmettik qyzmet kórsetý ortalyǵyndaǵy ahýaldy baqylaıdy
Atyraý oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetovtiń aıtynsha, №3 Arnaýly áleýmettik qyzmetter kórsetý ortalyǵy men oblystyq múgedekterdi saýyqtyrý mekemesi jedel basqarý ortalyǵynyń baqylaý kamerasyna qosylǵan.
«Áleýmettik qyzmet kórsetetin ortalyqtardy polıtsııa departamentine qarasty jedel-basqarý ortalyǵynyń beınebaqylaý júıesine qosýdy kópten beri kózdegen edik. Qazir atalǵan júıege Atyraý qalasyndaǵy №3 Arnaýly áleýmettik qyzmetter kórsetý jáne oblystyq múgedekterdi saýyqtyrý ortalyǵy qosyldy. Eki ortalyq ta kómekke muqtaj jandarǵa qyzmet kórsetetin bolǵandyqtan qaýipsizdikti qamtamasyz etýdiń mańyzy zor. Endi polıtsııa qyzmetkerleri atalǵan ortalyqtardaǵy qyzmetkerlerdiń jumys kezindegi tártibi, naýqastarmen qarym-qatynasy, syrttan tóner qaýipti baqylap otyrady», - dep habarlady Azamat Mámbetov.
Onyń aıtýynsha, aldaǵy ýaqytta №1 jáne №4 arnaýly qyzmetter kórsetý ortalyqtaryn jedel basqarý júıesine qosý josparlanyp otyr.
Eske sala ketelik, budan buryn Atyraýda múgedektigi bar adamdardy ońaltýǵa arnalǵan 150 oryndyq ortalyq salynatynyn habarlaǵan bolatynbyz.
Al jaqynda mentaldy aýytqýy bar balalar úshin kúndizgi statsıonar ashylady.
Kúndizgi statsıonarda medıtsınalyq-áleýmettik saraptaý komıssııasynyń tizimindegi aýtızm dıagnozy qoıylǵan, tserebraldi sal aýrýyna shaldyqqan, tirek-qımyly buzylǵan 30 bala tegin em alady.
Mamandar ár balamen jeke jumys isteıdi. Ár balaǵa 3 saǵat bólinedi. Olarǵa 45 kúndik em-dom kýrsyn júrgizýdi josparlanǵan.
