Atyraý polıtseıleri 1,2 tonna balyqty zańsyz tasymaldaǵan kúdiktilerdi ustady
Oblystyq polıtsııa departamenti baspasóz qyzmetiniń málimetinshe, eki kúdik Sharon ózeninde ustalǵan.
«Balyq qorlaryna qylmystyq qol suǵýshylyqqa qarsy kúres bóliminiń qyzmetkerleri «Bekire – 2023» balyq qorǵaý aktsııasy kezinde Qurmanǵazy aýdanyndaǵy Sharon ózeninen eki turǵyndy ustady. 1987 jáne 1991 jylǵy eki adam mingen qaıyqty tekserý kezinde jalpy salmaǵy 1 tonna 203 kelini quraıtyn sazan, jaıyn, kókserke, qutyqarakóz balyqtary tárkilendi. Ustalǵan kúdiktilerge qatysty QR Qylmystyq kodeksiniń 335-babynyń 3-bóligimen sotqa deıingi tergeý bastaldy», -dep habarlady departamenttiń baspasóz qyzmeti.
Sondaı-aq, Atyraý qalasynyń 33 jastaǵy turǵynynyń úıiniń aýlasyndaǵy saraına tekserý júrgizilgen.
Saraıdaǵy tońazytqyshtan 12 keli bekire tuqymdas, 13 kelini qara balyǵy tabylǵan.
Tárkilengen balyqtar «Jaıyq-Atyraý» bekire shabaǵyn ósirý zaýytyna tapsyrylǵan.
Bul derekke qatysty QR Qylmystyq kodeksiniń 339-babynyń 1-bóligimen qylmystyq iz qozǵalǵan. Qazir sotqa deıingi tergeý júrip jatyr.
Ózge aqparat QR Qylmystyq-protsestik kodeksiniń 201-babyna sáıkes jarııalaýǵa jatpaıdy.
Eske sala ketelik, budan buryn brakonerler Jaıyq jaǵasyndaǵy qamysqa 36 kelige jýyq bekire jasyrǵanyn habarlaǵan bolatynbyz.
Jaıyq ózeniniń «Peshnoı» eldi mekeni tusyndaǵy jaǵalaýynda qamys arasynan jalpy salmaǵy 35,9 keli 15 bekire tuqymdas balyq tabylǵan.
Baǵaly balyqtyń bári tárkilendi. Balyq resýrstaryna keltirilgen zalal – 18 mln 578 myń teńge.
