Atyraý perzenthanasynda jas bosanǵan analar daýys berdi
Atyraý qalalyq perzenthanasyndaǵy №80 ýchaskede 90 ana daýys berýge tirkelgen. Jergilikti ýaqytpen saǵat 7:00-de birinshi bolyp Gaýhar Buzaýbekova daýys berdi. Ol osy perzenthanada úshinshi sábıin 9 jyldan soń bosanypty. Perzenthanadaǵy referendým komıssııasy Gaýhar Buzaýbekovaǵa bala kútimine arnalǵan jıyntyqty syıǵa tartty.
Sondaı-aq, tuńǵyshyn ómirge ákelgen Kámshat Qaıratova da perzanthanadaǵy ýchaskede óz tańdaýyn jasady.
«Men búgin dárigerlerdiń kómegimen tuńǵyshymdy dúnıege ákeldim. Dál búgin, elimizde otandastarym tarıhı tańdaýyn jasaıtyn eń eleýli kúni ómirge kelgen tuńǵyshymnyń bolashaǵy jarqyn bolaryna senemin», - deıdi Kámshat Qaıratova.
Búgin, 5 maýsymda saǵat 00.00-den tańǵy 7.00-ge deıin Atyraý qalalyq perzenthanasynda 5 jas ana bosandy. Ómirge kelgen sábıdiń beseýi de – qyz.
Aıta keteıik, oblystyq aýmaqtyq referendým komıssııasynyń málimetine súıensek, 261 referendým ýchaskesinde daýys berý júrip jatyr. Al, aýrýhanalar, ýaqytsha qamaý oryndary men áskerı bólimshelerde 11 jabyq ýchaske ashylǵan.
Budan buryn Atyraý oblysynda referendýmda daýys beretin 400 myńǵa jýyq adam tirkelgenin jazǵan edik.
