«Atyraý-Oral» tasjoly tórt jolaqty bolady

NUR-SULTAN. QazAqparat - «Atyraý-Oral» avtomobıl joly jańa talapttarǵa sáıkes salynady, dep habarlaıdy QazAqparat.

«Respýblıkalyq mańyzǵa ıe «Atyraý-Oral» avtomobıl jolynda (75-125 shaqyrym) qaıta jańartý jumystaryn júrgizýge arnalǵan jobalyq-smetalyq qujattamany ázirleıtin kompanııany anyqtaý maqsatynda tıisti protsedýralar bastalǵan. Osylaısha, JSQ daıyn bolǵan soń, jolshylar tasjoldyń 50 shaqyrymynda qurylys-montajdaý jumystaryna kirisetin bolady», - delingen QR IIDM baspasóz qyzmetiniń málimetinde.

Atap aıtqanda, «Atyraý-Oral» avtomobıl joly – eki oblys ortalyǵyn baılanystyrýshy mańyzdy tranzıttik kóliktik dáliz. Ol Kaspıı teńiziniń porttaryna shyǵýǵa múmkindik beredi. Jol osydan 15 jyl buryn jóndeýden ótken bolatyn. Úshinshi tehnıkalyq sanattaǵy tasjoldyń qurylymy ostik júktemesi 8 tonnaǵa deıingi kólik quraldaryna laıyqtalyp, táýligine shamamen 3000 kólikti ótkize alady. Búginde Qazaqstanda avtomobıl joldaryn salý men qaıta jańartý oske 13 tonnaǵa deıingi eseptik júktememen júzege asyrylady. Tıisinshe, atalmysh joldyń jańǵyrtylýy qos óńir úshin asa qajet.

«Jol qaıta jańartý jumystarynan ótken soń tórt jáne eki jolaqty bolady. Búgingi tańda avtomobıl jolynyń ýchaskesinde (75-125 shaqyrym) qaıta jańartý jumystaryn júrgizýge arnalǵan JSQ ázirleıtin jobalyq kompanııa anyqtalǵan. Joba osy protsedýralar aıaqtalǵan soń iske asyryla bastaıdy», - dep atalyp ótken habarlamada.

Aıta ketý kerek, joba avtomobıl jolynyń ótkizý qabiletin arttyrýǵa, joldaǵy apattylyqty tómendetýge, Atyraý jáne Batys Qazaqstan oblystarynyń áleýmettik-ekonomıkalyq damýyn jaqsartýǵa, sondaı-aq, Qazaqstannyń tranzıttik áleýetin aıtarlyqtaı arttyrýǵa múmkindik bermek.

Eske salaıyq, «Atyraý-Oral» avtomobıl joly 2020-2025 jyldarǵa arnalǵan «Nurly jol» memlekettik baǵdarlamasy aıasynda qaıta jańartylady.