Atyraý óńirinde sý resýrstaryn tıimdi paıdalanýǵa qarajat qarastyrylýy tıis - Q. Işanov
ASTANA. Sáýirdiń 9-y. QazAqparat /Qanat Mámetqazyuly/ - Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Qaırat Işanov Atyraý oblysynyń Qurmanǵazy aýdany boıynsha sý resýrstaryn tıimdi paıdalaný máselesin kóterdi,
dep habarlaıdy QazAqparat.
«Aýdanda sý kólemi jyldan jylǵa azaıyp keledi. Turǵyndardy aýyzsýmen qamtamasyz etip otyrǵan Qıǵash, Sharon ózenderiniń gıdrologııalyq jaǵdaıy nashar, sý aǵysy qalypty jaǵdaıdan tómen, sońǵy 20-25 jylda melıoratıvtik jumystardyń, ıaǵnı ózen tabanynyń terendetilip qazylmaýy joǵarydaǵy jaǵdaıǵa ákelip otyr. Sońǵy jyldary kóktemgi qyzyl sýdyń tym az mólsherde kelýi, kólder men Sharon ózeniniń saǵasyndaǵy 12 kishi ózekterge sýdyń shyqpaı qalýy, aýdannyń ekologııalyq jaǵdaıyna, egin sharýashylyǵynyń kenjelep qalýyna áser etýde. Bul ózek boılarynda otyrǵan 218 sharýa qojalyqtarynyń jumystaryna keri áserin tıgizip jatyr», dedi senator.
Sonymen qatar depýtattyń aıtýynsha, aýdanda oblys boıynsha eń kólemdi, balyq tuqymdary ýyldyryq shashyp, ósip-ónetin aýmaǵy 100 myń gektardan asatyn, jem- qory mol iri jáne kishi aımaq bar eken. Biraq, sońǵy 3-4 jylda Sharon ózeniniń saǵasy men Qıǵash ózeniniń salasynda, teńiz arnalaryndaǵy jumystar júrgizilmegendikten balyq qorynyń kúrt azaıýy baıqalǵan.
«Jalpy Sharon, Qıǵash ózenderiniń salasynda jáne Kaspıı teńizi arnalarynda melıoratıvtik jumystardy júrgizý úshin respýblıkalyq bıýdjetten shamamen 1 mlrd. 256 mln. teńge qarajat qajet etiledi», dedi Q. Işanov.
