Atyraý óńirinde qaterli isik aýrýy «jasaryp» barady
NUR-SULTAN. QazAqparat - Atyraý óńirinde isik aýrýy «jasaryp» barady. Bul týraly búgin Atyraý oblysynyń ákimi Mahambet Dosmuhambetov aıtty, dep habarlaıdy QazAqparat tilshisi.
«Ekologııanyń buzylýy adam balasynyń densaýlyǵyna teris áser etetinin bilemiz. Onkologııa aýrýlaryna keler bolsaq, meniń málimetimshe Atyraý oblysy birinshi orynda emes. Respýblıka deńgeıinde ortasha nemese odan da tómen. Sońǵy 2-3 jylda 100 myń adamǵa shaqqanda bizde onkologııalyq kórsetkishterdiń jasaryp bar jatqanyn da bilip otyrmyz. Árıne, bul oblys boıysha úlken másele», - dedi Atyraý oblysynyń ákimi Ortalyq kommýnıkatsııalar qyzmetindegi baspasóz máslıhatynda.
Óńir basshysynyń dereginshe, Atyraý oblysynda onkologııalyq aýrýǵa shaldyqqan 4 100-den astam adam bar.
«Onyń úsh myńnan astam emdeýden ótken. Aýrýǵa qarsy kúres uımdastyrý baǵytynda qazir rentgen apparattary, tsıfrlyq momograftar, KT-apparattary, MRT-apparattary bir júıege qosyldy. Bul júıe onkologııalyq aýrýdy erte satyda anyqtap, naýqasty der ýaqytynda emdeýge múkindik beredi», - dedi Mahambet Dosmuhambetov.
