Atyraý oblysynyń Jylyoı aýdanynda birneshe eldi meken jaryqsyz qaldy
Jylyoı aýdandyq ákimdiginiń málimetinshe, aýdan ortalyǵy – Qulsary qalasy men birneshe eldi mekende jaryq sóngen. Buǵan «KEGOK» AQ-nyń magıstraldi elektr jelilerindegi kerneýdiń tómendeýi sebep bolǵan.
«Atyraý-Jaryq» AQ baspasóz qyzmetinen málim etkendeı, keshe, 10 shildede saǵat 21:24-te Mańǵystaý atom energetıkalyq kombınatynda №2 energııa blogy ajyratylǵan.
Osyǵan baılanysty Atyraý jáne Mańǵystaý oblysynyń energııa júıeleri Mańǵystaý atom energetıkalyq kombınaty (MAEK) arqyly tuıyqtalǵan rejımde jumys istegen. Al, Reseımen baılanysty «KEGOC» AQ-nyń 220 kVL – 254.0 tranzıttik jelisi jóndeýde bolǵan.
«Atyraý oblysynda «Karabatan Utility Solutions» JShS-niń №2 gaz týrbınaly generatory ajyratyldy. Sonyń saldarynan jıilik 49 Gts-ke deıin tómendedi. Osyǵan oraı elektr jelisindegi buzýshylyqtyń odan ári ýshyǵýyna jol bermeý maqsatynda tutynýshylardy avtomatty túrde ajyratý úshin avarııaǵa qarsy jıilikti arttyrý iske qosyldy. Al, «Atyraý Jaryq» AQ-nyń elektr jelilerinde tutynýshylardy kezekpen ajyratýǵa baılanysty shekteýlerdi engizetin sharalar qabyldandy», -dep málim etti «Atyraý-Jaryq» AQ-nyń baspasóz qyzmetinen.
Keshe, 10 shildede túngi saǵat 23:16-da «Karabatan Utility Solutions» JShS-niń №2 gaz týrbınaly generatory iske qosylǵan. Sodan soń elektr jelisindegi jıilik 50 Gts-ke deıin kóterilgen. Avarııaǵa qarsy avtomatty túrde ajyratylǵan tutynýshylardy jelige qosý júrgizilgen. «Atyraý Jaryq» AQ-nyń elektr jelilerinde engizilgen barlyq shekteý alynyp tastalǵan.
Al, búgin, 11 shildede saǵat 01:03-te elektr jelisiniń senimdiligin qamtamasyz etý úshin Reseımen baılanysty VL-220kV L-254.0 tranzıttik jelisi iske qosylǵan.
Eske sala ketelik, budan buryn Atyraý oblysynda qulaǵan elektr baǵanalary 1975 jyldan beri qoldanysta bolǵanyn jazǵan edik.