Atyraý oblysynyń jastary nesıe alyp, bıznes ashýǵa belsendi
ATYRAÝ. QazAqparat - Atyraý oblysynyń jastary arasynda kásipkerlikke bet burýshylardyń sany artyp keledi.
Aımaq boıynsha sońǵy jeti jylda 2500-den astam adam óz isin bastasa, olardyń 789-y jastarǵa tıesili, dep habarlaıdy QazAqparat.
Oblystyq jumyspen qamtý jáne áleýmettik baǵdarlamalar basqarmasynyń basshysy Erkin Shpanovtyńaıtýynsha, kóptegen jastar ómirlik úlken tájirıbeleri bolmasa da, kásipteriniń arqasynda óz jaǵdaılaryn jaqsartýmen qatar, qosymsha jumys oryndaryn quryp, elge qyzmet etýde.
Sońǵy jyldary kásip ashamyn deýshilerge beriletin nesıe túrleri men kólemderi de artyp otyr. Buryn nesıeler kóbine mal, egin sharýashylyǵyna alynsa, qazir azamattar polıgrafııalyq jumystarǵa, jańa úrdistegi kıim túrlerin shyǵarýǵa, shaǵyn oqý ortalyǵyn ashýǵa jáne jylyjaıda jańa ósimderdi shyǵarý baǵyttaryna alýda.
«Atyraý qalasynyń turǵyny Mırjan Erımanov alǵashynda jolaýshylardy tasymaldaý maqsatynda 3 mıllıon teńge turatyn Gazel avtokóligin nesıege satyp alyp, halyqqa qyzmet kórsetken. Ekinshi ret, 5 mıllıon teńgege avtobýsty nesıege alyp, qala syrtyndaǵy eldi mekender arasynda jolaýshylar tasymalymen aınalysyp otyr. Sondaı-aq Qurmanǵazy aýdanynyń Kýdrıashov okrýginiń 23 jastaǵy turǵyny Aqmaral Qoshanova memlekettik baǵdarlama arqyly 600 myń teńgege nesıe alyp, kompıýterlik ortalyǵyn ashsa, Ǵalııa Sultanova esimdi Inder aýdanynyń turǵyny tigin sheberhanasyn ashyp, qyz jasaýlaryn, kıim úlgilerin tigý arqyly úsh adamdy jumyspen qamtyp otyr. Atyraýda kásip ashýshylarǵa qoldaý jetkilikti», - deıdi Erkin Shpanov.
Erdos Qasym
