Atyraý oblysynyń veterınarııa salasyna 2012 jyldan beri jańa kólik berilmegen
Atyraý oblysy ákiminiń orynbasary Marat Mýrzıev veterınarlarmen jıyn ótkizip, saladaǵy qordalanǵan máseleler talqylandy. Oblystyq aýyl sharýashylyǵy basqarmasy basshysynyń orynbasary Azamat Aıtqalıevtyń málimetinshe, 69 veterınarııalyq pýnkt bar. Onda 271 veterınar, 76 kómekshi jumys isteıdi.
«Qazir veterınarııalyq mekemelerde qyzmettik maqsatta paıdalanylatyn 126 avtokólik bar. Qyzmettik kólikter kúndelikti profılaktıkalyq jáne dıagnostıkalyq jumystar júrgizý, aýyl sharýashylyǵy janýarlaryn birdeılendirý, sanıtarııalyq soıýǵa janýarlardy tasymaldaý sekildi jumystarǵa paıdalanylady. Alaıda, qyzmettik avtokólikter 2012 jyldary satyp alynǵandyqtan, jaǵdaıy óte nashar. Sol sebepten, 80-ge jýyq jańa kólik satyp alý qajet. Osy problemany birtindep sheshý úshin jol talǵamaıtyn 42 avtokólikti memlekettik satyp alý portalyna engizdik. Endi osy aıdyń aıaǵyna deıin jańa kólikter jetkiziledi. Qalǵany birtindep alynady», -dep habarlady Azamat Aıtqalıev.
Onyń aıtýynsha, veterınarııa salasynda qordalanǵan ózge máseleler de bar. Máselen, veterınarııalyq pýnktter jumysqa beıimdelmegen eski ǵımarattarda, tipti keıbiri jergilikti ákimdikterdiń bir bólmesinde ornalasqan. Onda jumys isteý, dári-dármek saqtaý, tehnıka men veterınarlyq qural-jabdyqtardy talapqa saı ornalastyrý múmkin emes. Malǵa epızootııaǵa qarsy is-sharalar ótkizetin arnaıy oryndar joq. Sonyń kesirinen veterınarlar úı-jaılardy aralap júredi.
«Oblysta bıologııalyq qaldyqtardy joıýǵa arnalǵan 29 ınsınerator peshi men 56 tıptik úlgidegi mal molasy bar. Sońǵy jyldary mal arasynda brýtsellez aýrýy azaıdy. Alaıda, arnaıy ǵımarat salý máselesi respýblıka deńgeıinde qozǵalyp keledi. Óıtkeni, Aýyl sharýashylyǵy mınıstrligimen zamanaýı veterınarııalyq-sanıtarııalyq ǵımarat bekitilmegen. Sol sebepten, jeke qurylysyn júrgizý, jobasyn jasaqtaý múmkin emes», - dedi Azamat Aıtqalıev.
