Atyraý oblysynyń úzdik kásipkerleri anyqtaldy
Oblystyq kásipkerlik jáne ındýstrııalyq-ınnovatsııalyq damý basqarmasy, «Atameken» UKP-nyń óńirlik palatasy men «Atyraý oblysynyń kásipkerleri men jumys berýshiler odaǵy» qoǵamdyq birlestigi uıymdastyrǵan «Jyl kásipkeri» baıqaýynyń úzdikteri marapattaldy. Úzdik kásipkerlerge júldeni oblys ákiminiń birinshi orynbasary Serik Aıdarbekov tapsyrdy.
«Táýelsizdiktiń 30 jylynda el ekonomıkasy eńselendi. Halyqaralyq deńgeıde el abyroıynyń artýyna túrli ekonomıkalyq reformalar men jańashyl bastamalar sebepker boldy. Osy kezeńde naryqtyq ekonomıkanyń qarqyndy damýy úshin kóptegen alǵyshart túzildi. Memlekettiń qoldaýynyń nátıjesinde Atyraýda da shaǵyn jáne orta bıznes ókilderi mol tabysqa kenelip, zor jetistikke jetip otyr. Jańadan ashylǵan júzdegen kásipkerlik nysandar men myńdaǵan jumys orny – osy sózimizdiń aıǵaǵy. Jergilikti atqarýshy bılik, kásipkerler men qoǵamdyq qaýymdastyq bir jaǵadan bas, bir jeńnen qol shyǵarǵanda ǵana zor jetistikke jetýge bolady», -deıdi «Atameken» UKP-nyń óńirlik palatasy keńesiniń tóraǵasy Gúlmıra Sabyrqyzy.
Baıqaý qorytyndysymen «Shıshka» dámhanasynyń ıesi Arý Kamalova – «Jas kásipker», «Kofe bým» kofehanasynyń ıesi Álisher Jýasbaev – «Qyzmet kórsetý salasynyń úzdigi», Atyraý qalasyndaǵy Býbnovskıı ortalyǵynyń dırektory Rıza Murzagalıeva – «Medıtsınalyq qyzmet kórsetý salasynyń úzdigi», «Dostan Ata» sharýa qojalyǵynyń jetekshisi Seıtjan Baljigitov – «Úzdik sharýa qojalyǵy», «ÝltraStab» jaýapkershiligi shekteýli seriktestiginiń basshysy Azamat Asylbekov – «Úzdik óndirýshi», «NýrAtyraýKýrylys» JShS dırektory Nurlan Nurmuhanov «Qurylys bıznesi salasynyń úzdigi» atandy.
Al, «Prime Family Group» kompanııalar tobynyń quryltaıshysy Nurlan Muqyshev «2021 jyldyń eń úzdik kásipkeri» ataǵyn ıelendi. Ol 14 jyl buryn jeke kásibin qoǵamdyq tamaqtaný salasynda bastaǵan. Qazir onyń kompanııalar tobynda «Gınza-Atyraý», «Choban» et meıramhanasy, «Barmaglot», «Fresh end goý» dámhanalary, «Kazbýrger» tez tamaqtaný oryndarynyń jelisi, dámhanasy, «Beıkerıst» naýbaıhanasy men «Vı Brend» kreatıvti agenttigi bar. Osy nysandarda 500 adam jumys isteıdi.
Sondaı-aq, «Bıznestaný «Álııa» baıqaýynda jeńimpaz atanǵan «AND Development» JShS dırektory Baqyt Ysqaqova men «Birlik – Mııaly» kesheniniń basshysy Aıjan Іzimova marapattaldy.
Eske sala ketelik, buǵan deıin Atyraýda jedel járdem dárigeri «Jyl adamy» atanǵanyn habarlaǵan edik.