Atyraý oblysynyń turǵyny úıinde kóne buıymdar mýzeıin ashty

Esepshi bolyp jumys istep, zeınetke shyqqan Ǵalymjan Muqashev tarıhı jádigerlerdi jınaýǵa bala kezinen áýestengen. Aldymen tiginshiligimen tanymal bolǵan anasy Molquıma Quspanǵalıevanyń aıaqpen qozǵalysqa keltiriletin urshyǵyn dalaǵa tastaǵysy kelmegen. Sóıtip, anasy tutynǵan buıymdardy kóneniń kózindeı saqtaýdy jón kórgen. Keıin soǵys ardageri, ishki ister salasynyń úzdigi atanǵan ákesi Batyrǵalı Muqashevtyń tutynǵan buıymdaryn jınaqtaýdy qolǵa alǵan.

«Osylaısha, úıimde mýzeı jasaqtala bastaǵanyn baıqamaı qaldym. Keıin mýzeı qoryn aýyl azamattarynyń buıymdarymen tolyqtyrdym. Qazir mýzeıdi ótken ǵasyrdyń 60-70-jyldaryndaǵy buıymdarmen tolyqtyryp jatyrmyn. Keıbir jádigerlerdiń júz jyldyq tarıhy bar. Mýzeıge bilte sham, útik, quman sekildi turmystyq buıymdardy da jınadym» -deıdi zeınetker Ǵalymjan Muqashev.

Onyń jeke mýzeıinde dıirmenniń tasy da tur. Televızor men radıo­qabyldaǵyshtyń, mýzykalyq aspaptardyń birneshe túri bar. Táýelsizdikpen birge aınalymǵa engen teńgeniń alǵashqy nusqalary da osy mýzeıden tabylady.

«Án jazylǵan plastınkany aınaldyratyn eski patefondy tabý qıyn ǵoı. Іs tigetin mashınka, radıonyń birneshe túri – kóne jádiger. Keıbirin aǵaıyn-týystardan, dostarymnan surap aldym. Belgili qalamger Rahmet Imanǵalıevtiń jazý mashınkasyn balalary tapsyrdy. Idaıat Qýanǵalıev degen kórshimniń tranzıstoryn aǵanyń kózindeı saqtap otyrmyn» - deıdi ol.

Ǵalymjan Muqashev qoly bosaǵan sátte ózi jasaqtaǵan shaǵyn mýzeıdegi kóne buıymdardy qalpyna keltirip, keıbirin óńdeıdi. Sol sebepten bolar, elý jyl burynǵy patefondar, radıo-tranzıstorlar áli kúnge deıin jumys isteıdi. Mys pen jezden, aǵashtan jasalǵan kóne buıym, ásirese telefon men fotoapparattyń alýan túri tizilip tur. Bolashaqta mýzeıdi keńeıtip, jurtshylyqqa tanystyrýdy maqsat etip otyr. Keıbir jádigerdiń tusyna shyqqan jylyn, ataýyn jazyp qoıýdy qolǵa almaq.