Atyraý oblysynyń turǵyndary medıtsınalyq qyzmet sapasyna jıi shaǵymdanady
«Mindetti áleýmettik medıtsınalyq saqtandyrý» (MÁMS) qory Atyraý oblystyq fılıalynyń dırektory Baıtolla Ǵazızovtyń aıtýynsha, bıylǵy 1 jeltoqsandaǵy statıstıkalyq derekke sáıkes 82 myń adam áli saqtandyrylmaǵan.
«Medıtsınalyq saqtandyrý júıesinen tys qalǵandardyń basym bóligi – Atyraý qalasynyń, Qurmanǵazy men Isataı aýdanyń turǵyndary. Olardyń áli kúnge saqtandyrylmaýyn birqatar faktormen, onyń ishinde turǵyndardyń áleýmettik medıtsınalyq saqtandyrý júıesi týraly jetkilikti habardar bolmaýymen baılanystyrý qajet. Tipti keıbir jumys berýshiler óz qyzmetkerlerin medıtsınalyq saqtandyrýmen qamtymaı, mindetti tólemderdi ýaqytyly aýdarmaı otyr», -dep málim etti Baıtolla Ǵazızov.
Onyń pikirinshe, óńirlik fılıal qyzmetkerlerine jyl basynan beri azamattardan kórsetiletin medıtsınalyq qyzmetterdiń, ásirese, alǵashqy medıtsınalyq-sanıtarlyq kómektiń sapasyna qatysty 348 ótinish túsken.
«Turǵyndardyń ótinishiniń bárine tekserý júrgizildi. Tekserý kezinde 219 ótinish negizsiz dep tanyldy. Al, 69 jaǵdaıda turǵyndardyń talaby rastalyp, kemshilikterdi joıý úshin sharalar qabyldandy. Medıtsınalyq mekemeler ózge ótinishter boıynsha dárigerlerge qatysty tártiptik yqpal etý sharalaryn qolǵa aldy», -deıdi Baıtolla Ǵazızov.
Fılıal dırektorynyń pikirinshe, qarashada barlyq aýdannyń turǵyndarymen kezdesý ótkizilgen. Kezdesýde turǵyndar kórsetiletin medıtsınalyq qyzmetterdiń sapasyna baılanysty shaǵym aıtqan.
«Turǵyndar mindetti áleýmettik medıtsınalyq saqtandyrý qoryna jarna tóleıdi. Biraq, kórsetiletin tegin qyzmetter sapasynyń tómendigine shaǵym aıtyp otyr. Olar aqyly medıtsınalyq qyzmetterdi alý úshin jeke klınıkalarǵa barýǵa májbúr», -dep málim etti Baıtolla Ǵazızov.
Eske sala ketelik, budan buryn Atyraýda bir kúnde eki júkti áıel aýrýhanada qaıtys bolǵanyn jazǵan edik.