Atyraý oblysynyń taǵy bir aýdanynda «Ashyq ákimdik» ashyldy
Atyraý oblysy ákiminiń orynbasary Erjan Ábilhanovtyń aıtýynsha, bul jobanyń maqsaty – turǵyndarǵa jedel ári sapaly qyzmet kórsetý arqyly sybaılas jemqorlyqqa jol bermeý. Endi aýdan turǵyndary aldyn ala jazylmaı-aq, memlekettik organ ókilderinen quqyqtyq jáne áleýmettik kómek ala alady.
«Prezıdent «Halyq úninen qulaq asatyn memleket» tujyrymdamasyn usyndy. Osyǵan oraı óńirde «Ashyq ákimdik» jobasy qolǵa alyndy. Ashyq formattaǵy keńsede aýyl sharýashylyǵy, qurylys jáne basqa salalar boıynsha memlekettik qyzmetter kórsetiledi. Bizdiń maqsatymyz – memlekettik qyzmetterdi bir ortalyqqa shoǵyrlandyrý. Munda «Ózine-ózi qyzmet kórsetý buryshy» jasaqtalyp, ǵalamtor jelisimen qamtyldy. Derbes kompıýterdi qoldaný arqyly ár turǵyn ózine qajetti qyzmetti alady. Arnaıy kútý zaly, balalardyń oıyn alańy jasaqtalyp otyr», - dedi oblys ákiminiń orynbasary Erjan Ábilhanov.
QR Sybaılas jemqorlyqqa qarsy is-qımyl agenttiginiń Atyraý oblysy boıynsha departamenti basshysynyń mindetin atqarýshy Qanat Qojahmetov bul keńseniń tıimdi tustaryn aıtyp berdi.
«Memleket basshysy bıylǵy Joldaýynda eki arada adam emes, qaǵazdyń júgirýi qajettigin alǵa tartty. Ashyqtyq, parasattylyq – ádildiktiń basty qaǵıdalary. Sol seepten, osyndaı formattaǵy «Ashyq ákimdik» keńsesi sybaılas jemqorlyqqa qarsy saıasatqa sáıkes keledi», - dedi ol.
Atalǵan departament basshysynyń birinshi orynbasary Aıdos Mamyttyń sózinshe, «Ashyq ákimdik» keńsesi – turǵyndar úshin qajetti aqparattar beretin, sybaılas jemqorlyq qyzmet kórsetetin alań.
«Maqsatymyz – memlekettik qyzmetker men qarapaıym halyqtyń arasynda tikeleı dıalog ornatý. Muny «Halyq únine qulaq asatyn memleket» qurý kontseptsııasynyń negizgi qaǵıdattarynyń biri deýge bolady. Turǵyndar osy keńseden memlekettik qyzmetterge baǵa bere alady», - dedi Aıdos Mamyt.
Eske sala ketelik, budan buryn Jylyoı men Isataı aýdanynda osyndaı keńseler ashylǵan bolatyn.
