Atyraý oblysynyń Reseımen shekarasyndaǵy Qıǵash ózeniniń jaǵalaýynda qamys órtendi
Qıǵash ózeni Atyraý oblysynyń Qurmanǵazy aýdanynda Reseı Federatsııasymen shekarada ornalasqan.
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, qamys órti keshe, 26 naýryzda tutanǵan.
«Qurmanǵazy aýdanyndaǵy Birlik aýylynan 20 shaqyrym qashyqtyqta ornalasqan Qıǵash ózeniniń jaǵalaýynda qamys órtendi. Bul týraly jergilikti ýaqytpen saǵat 16:55-te habar tústi. Qamys órti 30 gektar aýmaqty sharpydy. Tótenshe jaǵdaılar departamenti jáne Qurmanǵazy aýdandyq orman jáne janýarlar dúnıesin qorǵaý mekemesi qyzmetkerleriniń kúshimen 21 gektardyń qamys órti sóndirildi. Al, 9 gektar aýmaqtaǵy jalyn ózdiginen óshti», -dep habarlady departamenttiń qoǵammen baılanys toby.
Qamys órti keshe, 26 naýryzda túngi saǵat 21:30-da tolyq sóndirildi. Órtti sóndirýge Atyraý oblystyq TJD men Qurmanǵazy aýdandyq ormandar men janýarlar dúnıesin qorǵaý mekemesinen 31 qyzmetker, 1 tehnıka, 5 motopompa, 4 qaıyq tartylǵan.
Eske sala ketelik, Atyraýda kanal jaǵasyndaǵy 3 gektar aýmaqta qamys órtengen edi.
Keıin taǵy 1,5 gektar qamys órtenip, turǵyn úıdi sharpydy.
«Atyraý qalasyndaǵy Shákirov kóshesi tusynda Peretaska kanalynyń jaǵalaýy órtendi. Bul týraly jergilikti ýaqytpen saǵat 12:51-de shaqyrtý tústi. Kanal boıyndaǵy qamys órti sol mańdaǵy saıajaı ýchaskelerin sharpydy. Órttiń saldarynan 1 jazǵy turǵyn úı men aýlasyndaǵy sharýashylyq saraı, taýyq qora, jylyjaı bólikteri búlindi. Kanal jaǵalaýynda jalyn sharpyǵan qamystyń aýmaǵy – 1,5 gektar», - dep málim etken edi departamenttiń qoǵammen baılanys tobynan.