Atyraý oblysynyń prokýrory brakonerlikten bas tartqandarǵa qoldaý bildirmek
«Keshe qylmystyq istiń aıyptaý qorytyndysy sotqa jiberildi. Ázirge, árıne, sottyń qandaı sheshim shyǵaratynyn men bilmeımin. Bul bap boıynsha eń joǵarǵy jaza 5 jyl bas bostandyǵynan aıyrý» - dep jazdy E. Sybanqulov.
«Másele basqada: olar bul qadamǵa barardyń aldynda, tabıǵatqa qandaı zalal keltirgenderin, ol shyǵyndy qalaı toltyratynyn oılady ma eken? Sarapshylardyń esebinshe, tabıǵatqa kelgen zııan 378 mln teńgeden joǵary. Bul - olardyń árqaısysyna 95 mln teńgeden keledi degen sóz. Múliktiń tárkilenip, esepshottyń buǵattalýy, shetelge shyǵa almaý, júrgizýshilik kýálikten, basqa da múmkindikterden shektelý. Bul - oıynshyq emes. Otyzǵa da tolmaǵan jigitterge osy kerek pe edi?»,-dedi prokýror.
Qýatty sheteldik qozǵaltqyshtarmen jabdyqtalǵan brakonerlerdiń qos qaıyǵy 5 qarasha kúni Isataı aýdanynyń Jambaı aýylynyń ustalǵan bolatyn. Olardan 304 bekire tuqymdas balyq tárkilendi. Tórt qylmysker tutqyndalǵan.
«Áleýmettik jelidegi jurt olardy qorǵap, «áleýmettik jaǵdaıdyń tómendigi, jumyssyzdyq» degen syńaıda oılaryn jetkizgen edi. Osy rette meniń aıtarym, olar aqshasyz adamdar emes, qaıyqtary men ondaǵy jabdyqtarynyń baǵasy 10 mln teńgege deıin jetedi. Demek, bul adamdar brakonerlikti ózderiniń kásibine aınaldyrǵandar»,-dep qosty prokýror.
E. Sybanqulov sonymen qatar brakonerlikten bas tartyp, adal eńbek etkisi keletinderge qoldaý kórsetetinin de aıtty.
«Zań aıasynda balyq kooperatıvteri, artelder qurylsyn. Buǵan qandaı da bir tosqaýyldar paıda bolǵan jaǵdaıda bizge habarlańyzdar. Sýdaǵy balyqty kózsiz qyrýǵa eshkimge ruqsat berilgen joq jáne ony boldyrmaýǵa bar kúshimizdi salamyz»,-dedi ol.