Atyraý oblysynyń prokýratýrasy «Bıýdjetti tolyqtyrý - turaqtylyqtyń kepili» aktsııasyn ótkizýde
ASTANA. 3 sáýir. QazAqparat - Atyraý oblystyq prokýratýrasynyń bastamasy boıynsha sot oryndaýshylar men ýákiletti organdar birlesip, «Bıýdjetti tolyqtyrý - turaqtylyqtyń kepili» atty aktsııasyn ótkizýde.
Bul aqparatty QR Bas prokýratýrasynyń baspasóz qyzmeti taratyp otyr.
Vedomstvonyń atap ótýinshe, aktsııanyń tek alǵashqy 15 kúninde boryshkerlerden 15 mln. teńgeden astam soma óndirilip, memlekettik bıýdjetke aýdaryldy.
«Qazirgi tańda ýákiletti organdar qyzmetkerlerinen, ıaǵnı, ishki ister, salyq, ádilet, tótenshe jaǵdaılar, baqylaý jáne áleýmettik qorǵaý, memlekettik sanıtarlyq-epıdemıologııalyq qadaǵalaý departamentteri, balyq sharýashylyǵy ınspektsııasy jáne sot oryndaýshylarynan qurylǵan birikken utqyr toptar josparǵa sáıkes tekserýge shyǵyp, aıyppul, salyq jáne basqa da mindetti tólemder boıynsha bereshekteri bar boryshkerlerdi anyqtaýda. Olardan bereshekterdi naqty óndirý úshin sharalar qabyldaýda»,- delingen habarlamada.
Máselen, sot oryndaýshylary, salyq organdarynyń ınspektorlary jáne jol polıtsııasy qyzmetkerleri birlesip, boryshkerlerdiń bereshekterin kompıýter arqyly ortalyqtandyrylǵan derekten tekserýde. Olardyń avtokólikterin jol boıynda toqtatyp, aıyppuldy nemese salyq boıynsha bereshekti óndirýge áreket jasaýda. Osyǵan oraı oblys kóleminde 10 kezekshilik top qurylyp, ásirese, áýejaı, temirjol jáne avtokólik vokzaldary mańynda utqyr toptardan qurylǵan kezekshilik uıymdastyrylǵan.
