Atyraý oblysynyń polıtseıleri órt shyqqan úıden 30 turǵyndy evakýatsııalady
QULSARY. Atyraý olysyndaǵy Qulsary qalasynda kópqabatty úıdiń biri órtendi, dep habarlaıdy QazAqparat Polisia.kz-ke silteme jasap.
6 shilde kúni tańǵy 4:15 shamasynda kópqabatty úılerdiń biriniń dálizinen elektr shıtiniń aqaýy bolyp, órt shyqqandyǵy týraly «102» pýltine habarlama túsken.
Oqıǵa ornyna jedel jetken ýchaskelik polıtsııa ınspektorlary Parahat Pırmagambetov pen Ǵarıfolla Saǵıdollın, patrýldik polıtsııa vzvodynyń qyzmet ınspektorlary Aıdar Sharıpov, Rústem Sarýzınov, Qýantqan Saǵıdollaev jáne Alısher Sandıbaev turǵyndardyń kómek suraǵan daýysyn estip, tútinge oranǵan kópqabatty úıdiń 30 turǵynyn shuǵyl evakýatsııalady. Olardyń 10-y bala.
– Podezdi tútin basyp turdy, terezeden turǵyndar bizdi shyǵarmasańdar da balalardy shyǵaryńdarshy dep aıqaılap jatty. Oılanatyn ýaqyt bolmady, órt bizdi shyǵaryp bolsyn dep kútpeıdi ǵoı. Birinshi balalardy kıimmen búrkep, kóterip dalaǵa alyp shyqtyq. Eshkim zardap shekpedi, sol úshin qýandyq, – dedi patrýldik polıtsııa vzvodynyń qyzmet ınspektory Aıdar Sharıpov.
Aıta ketý kerek, mundaı jaǵdaı aqpan aıynda da oryn alǵan bolatyn. Sol kezde de Qulsary qalasynyń polıtseıleri turǵyndardy órtten qutqarǵan edi.
