Atyraý oblysynyń polıtseıleri izdeýde júrgen 80 qylmyskerdi ustady
Atyraý oblystyq polıtsııa departamenti baspasóz qyzmetiniń málimetine súıensek, ótken jyldardan beri 113 qylmyskerge izdeý salynǵan.
«Polıtsııa departamentiniń qyzmetkerleri ótken jyldardan beri tergeý, anyqtaý jáne sot organdarymen birlese izdeý salynǵan 113 qylmyskerdi ustaý úshin jedel-profılaktıkalyq is-sharalardy júrgizip keledi. Bıylǵy jyl basynan beri 80 kúdikti ustaldy, 33 qylmysker áli ustalǵan joq. Onyń ishinde adam óltirý kúdigimen izdestirilgen 7 qylmyskerdiń 2-eýi ustaldy. Kúdiktiler – Jylyoı aýdanynyń 1992 jáne 1994 jylǵy turǵyndary. Bıylǵy 25 qyrkúıekke qaraǵan túni jergilikti ýaqytpen saǵat 03:50 shamasynda 29 jastaǵy er adam oq jaraqatymen Jylyoı aýdandyq ortalyq aýrýhanasyna túskeni anyqtaldy. QR Qylmystyq kodeksiniń 99-babynyń 2-bóligimen qozǵalǵan qylmystyq iske qatysty eki kúdikti ýaqytsha ustaý ızolıatoryna qamaýǵa alyndy», -dep habarlady departamenttiń baspasóz qyzmeti.
Al, uıymdasqan qylmysqa qatysty 6 qylmysker izdestirilip, Atyraý qalasy aýmaǵynda jasyrynyp júrgen 2 kúdikti ustalǵan. Dál osyndaı kúdikke ilingen 4 qylmyskerdi izdeý áli jalǵasyp jatyr.
«Jyl basynan beri iz-túzsiz ketken 67 adamǵa izdeý salyndy. Onyń ishinde 53 adam tabylyp, izdeý esebinen shyǵaryldy. Sonyń biri Shymkent qalasynan joǵalǵan 16 jasar jasóspirimniń munaıly shaharda júrgeni anyqtalyp, úıine jiberildi», -dep málim etti departamenttiń baspasóz qyzmetinen.
Eske sala ketelik, Atyraýda túrli quqyq buzýshylyq jasaǵan 1 113 adamnan saýsaq izi alynǵanyn jazǵan edik.