Atyraý oblysynyń mektepteri beınebaqylaý júıesimen 100% qamtyldy
Oblystyq Polıtsııa departamentiniń bastyǵy Qamza Úmbetqalıevtiń aıtýynsha, qylmystardyń aldyn alý maqsatynda jyl basynan beri «Turmys», «Quqyqtyq tártip», «Esep» jedel-profılaktıkalyq is-sharalary uıymdastyrylǵan. Bıylǵy 9 aıda otbasy-turmystyq salasyndaǵy qylmystardyń sany 25% ósken.
«Oblysta osy kezeńde aqparattardy esepke alý kitabyna 30 myńnan astam habar men aryz-shaǵymdar tirkeldi. Onyń ishinde otbasy-turmystyq qarym-qatynasqa baılanysty oryn alǵan 4 934 quqyq buzýshylyq týraly habar tústi. Óz úıinde otbasy tynyshtyǵyn buzǵany úshin 1 479 adam ákimshilikke jaýapkershilikke tartyldy», - deıdi Qamza Úmbetqalıev.
Oblystyq Bilim basqarmasynyń basshysy Satqan Esenǵalıevtiń málimetine súıensek, 196 mektepke 8 126 beınebaqylaý júıesi ornatylyp, 100 paıyz qamtylyp otyr.
«Máselen, «Sergek» qurylǵysy arqyly jedel basqarý ortalyǵyna qosylǵan mektepter bar. Sondaı-aq, 39 mektepke mamandandyrylǵan kúzet qyzmeti kórsetiliedi, 138 mektepke týrnıket ornatyldy. Al, 196 mektepke «dabyl túımesi» qondyryldy», - deıdi Satqan Esenǵalıev.
Onyń deregine qaraǵanda, memlekettik 150 balabaqshaǵa 5 397, al, 17 kolledjge 695 beınebaqylaý kamerasy qoıylǵan. Endi memlekettik emes bilim berý oryndarynda da osyndaı qaýipsizdik sharalary qolǵa alynyp jatyr.
Aımaq basshysy Mahambet Dosmuhambetov quqyqbuzýshylyqty boldyrmaý baǵytyndaǵy jumystardy jandandyrý qajettigin aıtyp, jaýapty basshylarǵa birqatar tapsyrma berdi.
«Atyraý oblystyq Polıtsııa departamenti esepte turǵan janjalqorlarmen jáne qolaısyz otbasylarmen profılaktıkalyq jumystardy jandandyrýy kerek. Kóshelerde, kópqabatty turǵyn úıler alaptarynda, eski kólik turaqtary, ıesiz ǵımarattar men ózge de avtopatrýlder bara almaıtyn oryndarda jaıaý patrýldeýdi kúsheıtken jón», - dedi oblys ákimi.
Eske sala ketelik, budan buryn Atyraýda beınekamera kómegimen 14 myńǵa jýyq quqyq buzýshylyq anyqtalǵanyn jazǵan edik.
