Atyraý oblysynyń Maqat jáne Mahambet aýdandarynda IT-synyptar ashyldy
ATYRAÝ. QazAqparat - «Nur Otan» partııasynyń bastamasymen Atyraý oblysynyń Maqat jáne Mahambet aýdandarynda IT-synyptar ashyldy, dep habarlaıdy QazAqparat tilshisi.
«Nur Otan» partııasy Atyraý oblystyq fılıalynyń baspasóz hatshysy Elmıra Tuńǵatarovanyń aıtýynsha, oblystyń barlyq aýdandarynda ótkizilip jatqan «Biryńǵaı partııa kúni» sharasy aıasynda Maqat jáne Mahambet aýdandarynda balalarǵa arnalǵan IT-synyptar ashyldy. Bul is-shara jańa partııalyq jobalardy jáne elordanyń 20 jyldyq mereıtoıy men Prezıdenttiń bes áleýmettik jobasyn nasıhattaý maqsatynda uıymdastyrylyp otyr.
Dossor kentindegi B.Qanatbaev atyndaǵy orta mekteptiń 9-synyp oqýshysy Nursat Qulymjanov - bolashaq alleıanyń avtory. Onyń qaǵazdan jasaǵan týyndysy jýyrda aýdandyq, oblystyq baıqaýlarda úzdik atanyp, baıqaýdyń respýblıkalyq kezeńine ótti.
«Mektebimizde ІT-synyp ashylǵanyna óte qýanyshtymyn. Kópten beri óz eskızderimdi kompıýterlik baǵdarlamalarǵa salyp úırengim kelip júrgen. Men úshin bul jaqsy múmkindik boldy»,- deıdi ol.
Aıta ketý kerek, ótken aptada «Nur Otan» partııasy Atyraý oblystyq fılıalynyń bastamasymen Halel Dosmuhamedov atyndaǵy Atyraý memlekettik ýnıversıtetiniń bazasynda ashylǵan ІT-ortalyqtan dáris alǵan Nurgúl Úmbetqalıeva búginde oqýshylardyń jańa tehnologııalardy meńgerýge beıimi joǵary ekenin aıtady.
Al Mahambet aýdanyndaǵy E.Aǵeleýov atyndaǵy orta mekteptiń ІT mamany Rýslan Sultanov:
«Qazir tipti 8-9 jasar balalardyń da anımatsııalyq fılmder jasaýǵa, túrli oıyndar qurastyrýǵa qyzyǵýshylyǵy zor», - deıdi.
Aýdan ortalyqtarynda ashylǵan ІT-synyptar zaman talabyna saı veb-kameralarmen, lokaldyq ınternet júıesimen jabdyqtalǵan. Synyptarda arnaýly kýrstan ótken mamandar dáris beredi.
«Tsıfrlyq Qazaqstan» memlekettik baǵdarlamasyn júzege asyrý maqsatynda qolǵa alynǵan joba aıasynda Atyraý oblysynda bıyl 10 ІT-synyp ashý josparlanǵan. Bul mektepterde 2018 jyly - 700, 2019 jyly - 1500, 2020 jyly - 2000 bala oqytylady.
