Atyraý oblysynyń Qyzylqoǵa aýdanynda sý tasý qaýpi joǵary
Atyraý oblystyq tótenshe jaǵdaılar departamenti basshysynyń mindetin atqarýshy Nurlan Jańabaevtyń málimetinshe, 2021-2023 jyldarǵa arnalǵan sý tasqyny qaýpiniń aldyn alý jáne joıý týraly jol kartasy ázirlengen.
«Atyraý qalasy men aýdandarda arnaıy top qurylyp, sý tasqynynyń aldyn alýǵa baılanysty ázirlikti tekserý jumystary júrgizildi. 2021-2022 jyldary Qyzylqoǵa aýdanyndaǵy Noǵaıty ózeniniń arnasy tereńdetilmeı, Saǵyz aýylyn sý basty. Osyndaı qaýiptiń aldyn alý úshin Saǵyz, Noǵaıty ózenderiniń arnasyn tereńdetý jumystaryn júrgizip, bóget turǵyzý qajet. Al, «Mııaly - Inder - Atyraý» tas jolynyń Mııaly aýylynan shamamen 600 metr qashyqtyqtaǵy tusynan sý ótkizgish qubyr ornatý kerek», - dedi Nurlan Jańabaev.
Oblys ákimi Serik Shápkenovtiń pikirinshe, sý kelý qaýpi joǵary eldi mekenderdi baqylaýda ustaǵan jón.
«Bizdiń óńirde sý tasý qaýpi basym aýdannyń biri – Qyzylqoǵa. Sondyqtan, kóktemgi sý tasqynyna jan-jaqty daıyndyq júrgizý qajet. Ótken jyly osy aýdandy sý basty. Sol kezde sý basýy múmkin oryndardy kózben kórip, anyqtadyq. Bıyl da sý kóp keletini boljanyp otyr. Sol sebepten, qaı eldi mekenge qaýip tónýi múmkin ekenin anyqtap, jaǵdaıdy baqylaýda ustaý kerek», - dedi Serik Shápkenov.
Eske sala ketelik, buǵan deıin Atyraýda Noǵaıty ózeni tasyp, aýyldaǵy kópirdi sý shaıyp ketkenin habarlaǵan edik.
Keıin Atyraý oblysynyń Qyzylqoǵa aýdanynda tótenshe jaǵdaı jarııalandy.
