Atyraý oblysynyń Qurmanǵazy aýdanynda kúı merekesi ótti
ATYRAÝ. QazAqparat - Atyraý oblysyndaǵy Qurmanǵazy aýdanynyń S.Kóshekbaev atyndaǵy aýdandyq mádenıet úıinde qazaqtyń uly kúıshi-kompozıtory Qurmanǵazy Saǵyrbaıulynyń týǵanyna 200 jyl tolýyna arnalǵan «Shejiresi halqymnyń Qurmanǵazy» atty halyqaralyq dombyrashylar baıqaýy ótti, dep habarlaıdy QazAqparat tilshisi.
Baıqaýda elimizdiń batys aımaǵynan 6 úmitker baq synasty. Atap aıtqanda, Mańǵystaý, Batys Qazaqstan oblystarynan, Atyraý qalasynan, Mahambet, Qyzylqoǵa, Qurmanǵazy aýdandarynan arnaıy kelgen jastar óz ónerlerin ortaǵa saldy.
«Aýdanymyzdyń 90 jyldyq mereıtoıyna oraı jasaqtalǵan is-sharalardyń negizinde halyqaralyq dombyrashylar baıqaýyn ótkizýdi josparlaǵan bolatynbyz. Oǵan qatysýǵa nıet bildirgenderdiń sany kóp boldy. Biraq túrli sebepterge baılanysty bizdiń ortamyzdan tabylmaı otyr. Degenmen, biz sanǵa emes, sapaǵa mán berýge júginemiz. Úmitkerlerge uly babamyzdyń rýhy jelep-jebep, shabyt bersin. Búgingi bastaý alǵan Kúı merekesi qutty bolsyn»,- dedi aýdan ákiminiń orynbasary Órken Tájibaev.
Eki kúnge sozylǵan óner básekesinde aýdan ákiminiń orynbasary Ó.Tájibaev barlyq qatysýshylardy aýdan ákiminiń Alǵys hatymen marapattap, «Qurmanǵazy» atyndaǵy arnaıy júldeni atyraýlyq Asylhan Jolamanovqa tapsyrdy.
Úshinshi dárejeli laýreat ataǵy mańǵystaýlyq Maǵjan Ásembaevqa berilse, ekinshi oryndy Batys Qazaqstan oblysynan kelgen Azamat Qalıev pen Mahambet aýdanynan qatysqan Aıbolat Іzjanov enshiledi. Júldeli birinshi oryn atyraýlyq Asylhan Jolamanovqa buıyrdy. Qazylar alqasynyń tóraǵasy Oraq Jaýyruly baıqaýdyń bas júldesin, qurmanǵazylyq Bolat Doldashevqa tapsyrdy. Oǵan estelik syılyq retinde aǵash sheberi Jumalıev Talǵattyń qolynan shyqqan qolóner týyndysy tabystaldy. 
