Atyraý oblysynyń qos aýdanynda IT-synyptar ashyldy
ATYRAÝ. QazAqparat - Atyraý oblysyndaǵy Jylyoı, Isataı aýdandarynda IT-synyptar ashyldy, dep habarlaıdy QazAqparat tilshisi.
«Nur Otan» partııasy Atyraý oblystyq fılıalynyń baspasóz hatshysy Elmıra Tuńǵatarovanyń aıtýynsha, jańa partııalyq jobalardy jáne elordanyń 20 jyldyq mereıtoıy men Prezıdenttiń bes áleýmettik jobasyn nasıhattaý oblystyń barlyq aýdandarynda ótkizilip jatqan «Biryńǵaı partııa kúni» sharasy aıasynda ótip jatyr.
12 jasar Aqylbek Súleımenovtiń kompıýterlik baǵdarlamalarǵa qyzyǵýshylyǵy zor.
«Óz betimshe shaǵyn mýltfılmder qurastyrýdy úırengim kelip júrgende IT-synyp ashylǵany óte jaqsy boldy. Endi men bul jerde anımatsııalyq fılmder jasaýdy, túrli oıyndar qurastyrýdy úırenemin», - deıdi ol.
Aqylbek Jylyoı aýdany Qulsary qalasyndaǵy №8 mektep janynan ashylǵan IT-synyptyń alǵashqy oqýshylarynyń biri.
«Aýdanymyzda «Nur Otan» partııasynyń bastamasymen balalar úshin IT-synyptyń ashylýy eldiń bas partııasynyń erekshe qamqorlyǵy dep bilemin. Jáne bul zaman talabyna saı ashylǵan arnaıy synyptyń 8 jastan bastap balalardy qabyldaýy kóńil qýantady. Nemerem qazir 8 jasta, jańa tehnologııalardy jetik meńgergen. Bul jerde bilimin shyńdap, bolashaǵyna baǵdar alyp shyǵaryna senimdimin», - deıdi Isataı aýdanynyń turǵyny Nadejda Qurmanǵalıeva.
Aıta ketý kerek, «Tsıfrlyq Qazaqstan» memlekettik baǵdarlamasyn júzege asyrý maqsatynda qolǵa alynǵan joba aıasynda Atyraý oblysynda bıyl 10 ІT-synyp ashý josparlanǵan. Bul mektepterde 2018 jyly - 700, 2019 jyly 1500, 2020 jyly 2000 bala oqytylatyn bolady.
Sonymen qatar, «Rýhanı jańǵyrý» baǵdarlamasy boıynsha aýyldyq jerlerde aǵylshyn tilin úırenýge qolaıly orta qalyptastyrý jumystary qolǵa alynǵan. Bul maqsatta aǵymdaǵy jyldyń maýsym aıynan bastap Atyraý oblysy boıynsha 185 aǵylshyn tilin úıretetin arnaıy jazǵy lagerler ashylady.
Búgin Isataı aýdanynda ótken «Biryńǵaı partııa kúni» sharasy aıasynda Aqqystaý orta mektebinde aǵylshyn tilin úıretetin jazǵy lager óz jumysyn bastady.
