Atyraý oblysynyń keıbir aýdanynda múgedekterge qoldaý kórsetý jumysy baıaý júrýde
Atyraý oblysy ákiminiń orynbasary Jasulan Bısembıev múgedekter isteri jónindegi úılestirý keńesiniń otyrysyn ótkizdi. Onda oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Azamat Mámbetov múgedektigi bar adamdardy tehnıkalyq ońaltý quraldarymen jáne arnaıy qyzmettermen qamtamasyz etý máselesin kóterdi.
«Oblysta áleýmettik qyzmetter portalyna tehnıkalyq ońaltý quraldarymen qamtamasyz etý úshin 12 507 múgedektigi bar adam ótinish berdi. Onyń ishinde 7 774 adam qajetti quraldarymen qamtyldy. Alaıda, Atyraý qalasy men Qyzylqoǵa, Inder, jáne Maqat aýdanynda sýrdotehnıkalyq, tıflotehnıkalyq, protezdik-ortopedııalyq, mindetti gıgenalyq jáne arnaýly quraldarymen qamtý isi baıaý atqarylady. Al, Qurmanǵazy aýdanynda ınvataksı qyzmeti iske qosylǵan joq», - dep málim etti Azamat Mámbetov.
Onyń aıtýynsha, erekshe jandardyń kirip-shyǵýyna beımidelmege nysandar bar. Bul máselege keıbir mekemeler men aýdandar atústi qarap otyr.
«Jyl sońyna deıin 259 nysandy múmkindigi shekteýlilerge beıimdeý josparlandy. Onyń oryndalysy týraly aqparat invo.gov saıty arqyly baqylanady. Qazir bul saıtta málimette Qyzylqoǵa, Qurmanǵazy jáne Inder aýdanynyń kórsetkishi nólge teń. Demek, jospar oryndalmaı otyr. Al, Atyraý qalasynda beıimdeýdi qajet etetin 259 nysan bar. Qazir onyń 43-i ǵana beıimdelgen. Arnaıy monıtorıng qorytyndysymen medıtsınalyq nysandarda da qolaıly jaǵdaı jasalmaǵany anyqtaldy», - dep habarlady Azamat Mámbetov.
Eske sala ketelik, budan buryn Atyraý oblysy ákiminiń múgedekter máselesi jónindegi úsh keńesshisi taǵaıyndalǵanyn jazǵan edik.
