Atyraý oblysynyń Isataı aýdanynda óner mektebiniń qurylysy bastaldy
Isataı aýdany ákimdiginiń baspasóz qyzmetinen málim etkendeı, eki qabatty ǵımarattyń jalpy aýdany – 4276,81 sharshy metr. Qurylys jumystaryn «SALA» JShS 19 aıda aıaqtaý josparlap otyr.
«Óner mektebinde birinshi qabatynda 183 oryndyq akt zaly, árqaısysy 8 adamdyq mýzyka synyby, qoldanbaly óner, árbiri 6 adamdyq keskindeme, sýret, músin sheberhanalary ornalasady. Munda 11 adamdyq bı sabaǵyna arnalǵan zal men 16 oryndyq býfet bar. Al, ekinshi qabatta oqý zaly bar kitaphana bólmeleri qarastyrylǵan. Ǵımaratta 10 adamdyq hor jáne orkestr synyby, árqaısysy 8 oryndyq óner tarıhy jáne poetıkalyq óner kabıneti, 10 adamdyq ansambl sabaǵyn ótkizetin synyp josparlanyp otyr. Ǵımarattyń syrtynda túrli is-sharalardy ótkizý úshin 137 orynǵa arnalǵan amfıteatr salynady», - dep málim etti merdiger mekemeniń ókili Rýslan Sıǵýatov.
Onyń aıtýynsha, óner mektebiniń ǵımaraty salynatyn jer telimi qorshalyp, tegistelgen. Bul jerge qurylys materıaldary tasymaldanyp jatyr. Óner mektebiniń qurylysy 2024 jylǵy maýsym aıynda aıaqtalmaq.
Eske sala ketelik, buǵan deıin Atyraý oblysynda «Jaıly mektep» aıasynda 12 bilim ordasy salynatynyn habarlaǵan bolatynbyz.
Atyraý oblysy ákiminiń orynbasary Jasulan Bısembıevtiń deregine qaraǵanda, qazir 143 481 oqýshy jalpy orta bilim beretin 200 mektep bar.
