Atyraý oblysynyń indetten qyrylǵan maldyń ótemine bólingen qarjy jetkiliksiz
ATYRAÝ. QazAqparat - Seısenbide aýdan ákimderi jáne basqarma basshylarymen selektorlyq keńes ótkizý barysynda Atyraý oblysynyń ákimi Nurlan Noǵaev maly qyrylǵan turǵyndarǵa ótemaqyny durys bólýdiń qajettiligin atap ótti.
«Aýyl sharýashylyǵy mınıstrliginde ótken brıfıngte 750 iri qaraǵa eseptelgen 120 mln teńge ótemaqy bıýdjetten bólingeni aıtyldy. Bastapqy esepteý boıynsha ár úı janýaryna 160 myń teńgeden ótemaqy beriledi. Alaıda ótemaqy ótemaqy somasynyń óskeni týraly qujat ázrleý kerek. Qazirgi tańda 835 bas mal qyryldy, al aqsha 750 iri qaraǵa bólindi. Bul máseleni sizder (veterınarııa basqarmasy) mınıstrlikpen birge sheshýlerińiz kerek, ótemaqy qarjysyn durys bólý jáne barlyq maly ólgen turǵyndarǵa tóleý úshin ony ulǵaıtýǵa qol jetkizý qajet», - dep ákim oblystyń veterınarııa basqarmasyna tapsyrma berdi.
Keńeste veterınarııa basqarmasynyń basshysy Nurbaı Ábdirahmanov sýyq túsýi jáne aýrýdy taratatyn qan sorǵysh jándikterdiń azaıýynan indettiń beti qaıtqanyn jarııa etti.
«Sonymen qatar biz «Flektron» fırmasynyń úı janýarlaryna shybyn jáne qansorǵysh masany jolatpaıtyn syrǵalaryn satyp aldyq. Qazir 6 000 syrǵa alyndy, alaıda buǵan aqsha qarastyrylmaǵan, sondyqtan mal ıeleri men sharýa qojalyqtary óz maldary úshin ony satyp alýy kerek. Bir jup taǵylatyn syrǵa quny 750 teńge», - dedi N. Ábdirahmanov.
Úsh karantın aımaǵyndaǵy maldyń sany 79 myń bas. Onyń ishinde nodýlıarly dermatıtke 6 335 bas mal shaldyqqan. 3 423 úı janýary medelip jazylsa, 2 077-isine áli dári berilýde. 835 iri qara indetten qyryldy.
