Atyraý oblysynyń eki aýyly «Úzdik 30 aýyl» jobasyna endi
«Úzdik 30 aýyl» jobasynyń avtory, «Tulǵa-dostyq» qoǵamdyq qorynyń dırektory, aqyn Murathan Shoqannyń aıtýynsha, atalǵan joba el Táýelsizdiginiń 30 jyldyǵyna oraı qolǵa alynǵan.
Respýblıkalyq jobaǵa Mahambet aýdanynyń ortalyǵy – Mahambet aýyly men Jylyoı aýdanyndaǵy Shoqpartoǵaı aýyly engen. Ár óńirdegi bolashaǵy zor eldi mekender arasynan ozyq shyqqan munaıly óńirdiń eki aýyly týraly málimetter «Úzdik 30 aýyl» anyqtamalyq kitabynda jazylǵan.
«Aýyl – qazaqtyń qazyǵy, altyn besigi. Al atalǵan jobanyń maqsaty – úzdik aýyldardy anyqtap, ózgelerge úlgi etý. Týǵan aýylyn kórkeıtýge úles qosyp júrgen azamattardy dáripteý, sol arqyly kásipkerlerdiń, jastardyń nazaryn týǵan mekenge burý», - deıdi joba avtory Murathan Shoqan.
Talantty aqyn týǵan jerge tý tigip, aýylǵa janashyrlyq tanytqan azamattardy óskeleń urpaqqa ónege etip, jastardyń týǵan jerge degen teris pikirin túzetýdi maqsat etken. Sapaly ári tuşymdy dúnıe jazyp shyǵý úshin avtor bir aı úzdiksiz aýyl-aımaqty aralaǵan.
«Úzdik 30 aýyl» jobasyna engen Mahambet aýylynda 13 myńnan astam turǵyn, 20-ǵa jýyq ózge etnostyń ókili turady. Aýylda 3 orta mektep, 1 saz mektebi, 2 sport mektebi, 5 balabaqsha, 1 emhana men aýrýhana, ortalyq jáne balalar kitaphanasy, jańadan salynǵan murajaı, sáýletti mádenıet úıi jáne meshit bar.
Munda 2007 jyldan bastap ıpotekalyq ádispen eki qabatty 80 úı shaǵyn aýdan retinde boı kótergen. Barlyq úıler men mekemeler túgelge jýyq tabıǵı gaz jelisine qosylǵan. Aýylda 3 saýda úıi, 3 janar-jaǵarmaı quıý stansasy tutynýshyǵa qyzmet kórsetedi. Egin jáne mal sharýashylyǵymen aınalysatyn 12 sharýa qojalyǵy jumys isteıdi.
Al Jylyoı aýdanyndaǵy Shoqpartoǵaı aýylynda 3 100-den astam turǵyn tirkelgen. Bul aýylda 58 sharýa qojalyǵy, 1 balabaqsha, 1 mektep, 1 emhana men sport mektebi jumys istep tur.
Joba avtory Murathan Shoqannyń málimetinshe, «Úzdik 30 aýyl» anyqtamalyq kitabyna qos aýyldyń tarıhy, tynys-tirshiligi, bilim, sport, densaýlyq, mádenıet salasy men áleýmettik-ekonomıkalyq damý jaǵdaıy, shaǵyn jáne orta kásipkerliktiń órkendeýi týraly málimetter qamtylǵan. Sondaı-aq aýyldan shyqqan tanymal tulǵalar jóninde maǵlumattar engizilgen.
