Atyraý oblysynyń bıýdjetine ekologııalyq tólemderden 9 mlrd teńge túsken
ATYRAÝ. QazAqparat – Atyraý oblysynyń bıýdjetine ekologııalyq tólemderden 9 mlrd teńge túsken, dep habarlaıdy QazAqparat.
Ekologııa, geologııa jáne tabıǵı resýrstar mınıstri Serikqalı Brekeshevtiń aıtýynsha, 2020 jyly Atyraý oblysynyń ekologııalyq problemalaryn keshendi sheshý jónindegi Jol kartasy bekitilgen.
«Jańa Ekologııalyq kodekstiń engizilýimen jergilikti atqarýshy organdar tabıǵat qorǵaý is-sharalaryna emıssııa úshin tólemaqyny 100% paıdalana alady. Byltyr Atyraý oblysynyń bıýdjetine ekologııalyq tólemderden 9 mlrd teńgeden astam qarjy tústi. Jol kartasyn qaıta qarap, jergilikti bıýdjetten qarjylandyrylatyn qosymsha is-sharalardy qosýdy usynamyn. Turǵyndar Jol kartasynyń oryndalý barysy týraly bilýge tıis. Sol sebepten, jurtshylyqpen toqsan saıyn esep berý kezdesýlerin ótkizip, jumys nátıjeleri men óńirdiń ekologııalyq jaǵdaıy týraly habardar etý qajet», -dedi Serikqalı Brekeshev.
Mınıstr oblystaǵy barlyq aýdanda ekologııalyq jáne sanıtarlyq talaptarǵa sáıkes keletin qatty turmystyq qaldyqtar polıgony joq ekenine nazar aýdardy.
«Oblys aýmaǵynda 55 qatty turmystyq qaldyqtar polıgony bar. Onyń 8-i ǵana ekologııalyq turǵydan ruqsat alǵan. Qazir keıbir polıgondar qoqysqa tolǵan. Qaldyqtar kóbinese ruqsat etilmegen jerge tógiledi. Atyraý qalasyndaǵy qatty turmystyq qaldyqtar polıgony 1977 jyldan beri paıdalanylyp keledi. Munda qaldyqtar jıi janady. Bul Atyraý qalasynyń aýa basseınin lastaýdyń qosymsha kózi bolyp otyr», -dedi mınıstr.
Qazir Maqat pen Inderden basqa aýdandarda aǵyndy sýlardy tazalaýǵa arnalǵan nysan joq.
«Sarqyndy sýlar jergilikti jerdiń relefine ekologııalyq ruqsat berý qujattamasynsyz aǵyzylady. Osy jyldyń basynda Qulsary qalasy turǵyndarynyń shaǵymy boıynsha «Jylyoı Sý» kásipornyna tekserý júrgizildi. Kásiporynda qorshaǵan ortaǵa emıssııaǵa ruqsattyń joqtyǵy anyqtaldy. Sarqyndy sýlardy aǵyzý tazartýsyz júzege asyrylǵan. Tekserý nátıjesimen ákimshilik is qozǵalyp, kásiporyn qyzmetin toqtata turý týraly sotqa talap aryz berildi», -dedi mınıstr.
Eske sala ketelik, budan buryn Serikqalı Brekeshev Atyraý oblysyndaǵy ekologııa problemalaryna nazar aýdarǵanyn jazǵan bolatynbyz.
