Atyraý oblysynyń birneshe aýylynda erigen qar sýy sorylyp jatyr
Sý basý qaýpi bar aýdannyń biri – Inder. Aýdan ákimi Daryn Shamuratovtyń aıtýynsha, qazir sý basý qaýpiniń aldyn alý jumystary júrgizilip jatyr.
«Qardyń kóp túsýine baılanysty sý basý qaýpi áli seıilgen joq. Kún kúrt jylynyp, jaýyn-shashyn bolsa, aýdannyń birqatar aýylynda erigen qardyń saldarynan qıyndyq týyndaýy yqtımal. Sol sebepten, aýdan aýmaǵynda qar sýynyń úıge kirmeýin qamtamasyz etý úshin 18 tehnıka jumyldyryldy. Qazir Inderbor kentinde, Jarsýat, Órlik, Eltaı aýyldyq okrýgterindegi turǵyn úılerdi sý basý qaýpi bolýy múmkin aýmaqtar naqtylandy. Kúsheıtilgen rejımde uıymdastyrylǵan jumystardyń nátıjesinde Jarsýat aýyldyq okrýgindegi qaýip seıildi», -dep habarlady Daryn Shamuratov.
Ákimniń málimetinshe, Inder aýdanynda 11 myń tekshe metr qar shyǵarylǵan. Qazir 22 motopompamen erigen qar sýy sorylyp jatyr. Sondaı-aq, tótenshe jaǵdaılar qyzmetiniń sý soratyn eki kóligi tartylǵan.
Oblystyq tótenshe jaǵdaılar departamentiniń qoǵammen baılanys tobynan málim etkendeı, Qyzylqoǵa aýdanynyń Mııaly aýylyndaǵy jer úılerdiń aýlasyn sý basqan.
«Mııaly aýylynda ornalasqan úsh úıdiń aýlasynan bir kúnde 600 tekshe metr qar sýy soryldy. Oǵan departament pen jergilikti atqarýshy organnan 50 qyzmetker, 5 tehnıka men 6 motopompa tartyldy», -dep málim etti departamenttiń qoǵammen baılanys tobynan.
Eske sala ketelik, buǵan deıin Atyraý oblysynda jeńil kólik erigen qar sýyna batyp ketkenin jazǵan edik.
https://kaz.inform.kz/news/atyrau-oblysynda-zhenil-kolik-erigen-kar-suyna-batyp-ketti_a4043516