Atyraý oblysynyń aýdandarynda «Bıler keńesi» quryldy
ATYRAÝ. QazAqparat - Atyraýdyń aýdan ortalyqtarynda «Bıler keńesi» qurylýda, dep habarlaıdy QazAqparat tilshisi.
Atyraýdaǵy Jylyoı aýdandyq sotynyń uıymdastyrýymen «Nur Otan» partııasy aýdandyq fılıalynyń ǵımaratynda «Bıler keńesin qurý - ulttyq qundylyǵymyzdy jańǵyrtý» taqyrybynda keńes ótkizildi. Kezdesýdi ashqan sot tóraǵasy B.Jumabaev Elbasymyzdyń «Bolashaqqa baǵdar: Rýhanı jańǵyrý» atty baǵdarlamalyq maqalasynda qazaqtyń bıler keńesin ulttyq qundylyqtar retinde tanyp, halyq arasynda keńinen nasıhattaý qajettigin aıtqanyn atap ótti.
«Kóshpeli qazaq qoǵamynyń bıler soty tarıh qoınaýynda qalsa da, onyń bedeli men mártebesi búgingi kúnge deıin jalǵasyn taýyp otyr. Ulttyq tarıhymyzdaǵy asyl qazynalarymyzdy zertteý, onyń shynaıy nátıjelerin jaryqqa shyǵarý qaı urpaq úshin de joǵary mindet bolyp sanalady», - dep málim etti Jylyoı aýdandyq sotynyń baspasóz qyzmeti.
Kezdesý qorytyndysy boıynsha Jylyoı aýdanynda Bıler keńesin qurý týraly sheshim qabyldandy. Oblystyq sottyń baspasóz qyzmeti habarlaǵandaı, mundaı keńester barlyq aýdandarda qurylady. Sondaı-aq, jıyn barysynda barlyq qatysýshylar atalǵan jobany aýdandyq deńgeıde júzege asyrý, halyq arasynda ózara daýlardy sheshý tásilderin talqylady.
