Atyraý oblysynyń ákimin ekologııa máselesi alańdatady
ATYRAÝ. QazAqparat - Búgin Atyraý oblysynyń ákimi Nurlan Noǵaev aýdan ákimderimen jáne kommýnaldyq qyzmet jetekshilerimen selektorlyq jınalys ótkizdi, dep habarlaıdy QazAqparat.
«Men Telegram chat-kanalyna túsetin barlyq aqparattardy muqııat qarap otyramyn. Atyraýdan ǵana emes, aýdandardan da sanıtarlyq tazalyqqa qatysty túsetin shaǵymdar az emes.Turǵyndardy qatty turmystyq qaldyqtardy jınaý men suryptaý jaǵdaıy da alańdatady», - dedi Nurlan Noǵaev.
Oblys ákimi atap ótkendeı, bul problema barlyq basshylardyń baqylaýynda bolýy tıis. Birinshi kezekte qalanyń, Inder, Qurmanǵazy, Jylyoı aýdandarynyń basshylary osy máselege jite mán berýleri kerek.
«Bul óte ózekti problema. Jasalyp jatqan jumystar jetkiliksiz. Árıne aldymen adamdardyń túsinikterin ózgertý kerek. Tazalyqty saqtaý - barshaǵa ortaq mindet»,- dep atap ótti aımaq basshysy.
Kóshege tastalǵan qoqys qala men oblystyń kórkin ketirip qana qoımaıdy, epımedımologııalyq jaǵdaıǵa da áser etedi.
«Ortalyq kósheler taza bolǵanymen shaǵyn kósheler nazardan tys qalyp jatyr.
«Arnaýly avtobaza» JShS-n senimdi basqarýǵa berdik. Jumys isteńizder, qala tazalyǵy sizderdiń mindetterińizde», -dedi Nurlan Noǵaev.
Oblystyq tabıǵı resýrstar jáne tabıǵat paıdalanýdy retteý basqarmasynyń basshysy Qadyrjan Arystan Ekologııalyq kodeks talabyna sáıkes 2019 jyldan bastap qatty turmystyq qaldyqtardy saqtaýǵa tyıym salynatynyn atap ótti. Qaldyqtardy suryptap, qaıta óńdeýden ótkizý kerek. Qazir oblys boıynsha QTQ suryptaý úlesi 16,7% (respýblıka boıynsha 11,5%).
«Qalada kórsetkish 20%, Jylyoı aýdanynda - 6% bolyp otyr. Qalǵan aýdandarda bul jumys tipti júrip jatqan joq. Bıyl jergilikti bıýdjetten osy jumystardy oblys boıynsha júrgizý úshin qarajat bólýdi josparlap otyrmyz», - dep atap ótti Qadyrjan Arystan.
Problemalardyń biri - qaldyqtardy tabıǵı qoqys ornyna tasý. Jaǵdaıdy turǵyndardyń ózderi qıyndatyp otyr, qoqysty kez kelgen jerge laqtyra salý áli joıylǵan joq.
«Shara qoldaný kerek. Jeke sektordaǵy septikterdi tazalaıtyn kólikter qaldyqtardy kárizdik tazartý qondyrǵysyna jetkizbeı, qala aýmaǵyndaǵy qudyqtarǵa quıa salatyn derektermen qalaı kúreskenimiz esterińizde shyǵar. Tıisti sharalardy qoldanyp, aıyppul saldyq, qazir mundaı derekter joq. Áleýmettik jelilerdegi paraqshalarymyzǵa fotodáıekter jiberý arqyly turǵyndar kóp kómektesti. Demek, ádister bar, bul tájirıbeni tabıǵı qoqys oryndaryn buzýshylarǵa qatysty da qoldanýǵa bolady», - dep esepteıdi Nurlan Noǵaev.
Jergilikti polıtsııa qyzmetiniń basshysy Álibek Qaıyrovtyń aıtýynsha, jyl basynan beri osyndaı buzýshylyqtyń 500-ge jýyq deregi anyqtalǵan. Kinálilerge ákimshilik aıyppul salyndy. Buzýshy zańǵa qaıshy áreketi úshin 51 myń teńgege deıin aıyppul tóleıdi.
«Óńirimizdi qoqys pen lastyqtan tazalaý - bárimizge ortaq jumys. Árbir basshy osy jumysty baqylaýda ustap otyrýy kerek. Qoqys polıgonyn, suryptaý tsehtaryn salý josparda bar, biraq bul jobalar júzege asqanǵa deıin qol qýsyryp qarap otyrmaýymyz kerek. Aımaqtyń sanıtarlyq-epıdemıologııalyq jaǵdaıy barlyq jaýapty tulǵalardyń únemi baqylaýlarynda bolýy tıis»,-dedi jınalysty qortyndylaǵan aımaq basshysy.
