Atyraý oblysynyń ákimi Jaıyqta balyq qyrylýyna qatysty pikir bildirdi
ASTANA. QazAqparat - Búgin Inder aýdanyna jumys saparyn jasaǵan Atyraý oblysynyń ákimi Nurlan Noǵaev Jaıyq ózeninde balyqtyń jappaı qyrylýyna qatysty pikir bildirdi, dep habarlaıdy QazAqparat tilshisi.
«Búgingi kúni quqyq qorǵaý organdary Jaıyq ózeninde balyqtyń jappaı qyrylýyna qatysty tekserý amaldaryn júrgizip jatyr. Olar aıaqtalǵannan keıin quqyq qorǵaý organdary qalyptasqan ahýalǵa quqyqtyq baǵa beretin bolady», - dedi Nurlan Noǵaev jýrnalısterdiń saýalyna oraı.
Oblys ákimi arnaıy vedomstvoaralyq komıssııanyń qurylyp, qazirgi ýaqytta jumys júrgizip jatqandyǵyn da atap ótti. Zerthanalyq zertteýler Jaıyq ózeni sýynyń halyq tutynýy úshin qaýipti emes ekendigin kórsetken. Búgingi kúni balyq qyrylýynyń jańa faktileri tirkelgen joq.
«Atyraý bazarlaryndaǵy balyq ónimderiniń qaýipsizdik máselesine keler bolsaq, satylyp jatqan barlyq balyq ónimderi sertıfıkattalǵan. Veterınarlyq, sanıtarlyq epıdemıologııa qyzmetteri turaqty negizgi baqylaý júrgizip otyrady. Barlyq ókiletti organdar satylatyn ónimniń qaýipsizdigi máselesimen aınalysady», - dedi óńir ákimi.
Esterińizge sala ketsek, buǵan deıin Atyraý oblysynda balyqtyń qyrylǵany týraly birneshe aqparat taratqan bolatynbyz. Naqtyraq aıtqanda, ótken jyldyń jeltoqsan aıynyń basynda Atyraý qalasynyń syrtyndaǵy Peretask shaǵyn ózeninde balyqtardyń jappaı qyrylý oqıǵasy tirkelgen edi.
Arada apta ótpeı Atyraý oblysyndaǵy Jaıyq ózeninde balyqtardyń jappaı qyrylǵany anyqtalǵan.
Ókinishke qaraı, jeltoqsanda taǵy da alabuǵa, torman, qylyshbalyq sekildi qara balyqtardyń qyrylǵany týraly aqparat tarady.
Osy jaǵdaıǵa baılanysty Atyraý oblystyq orman sharýashylyǵy jáne janýarlar dúnıesi aýmaqtyq ınspektsııasy balyqtyń jappaı qyrylý faktisi boıynsha qylmystyq is qozǵalatynyn jarııa etken edi.
Jalpy, Jaıyq ózeninen 28 qańtarǵa deıin 108,1 tonna óli balyq jınap alynǵan.
Avtory: A.Sokolov
